WILLEMSTAD.- Den e último kuater aña Fundashon Kas Popular a risibí sufisiente tereno pa traha kas di pueblo di karakter sosial, pero tambe terenonan pa traha kas di klase medio. Te awor e fundashon a traha apénas 129 kas di karakter sosial i tambe 51 kas pa e klase medio. Tambe FKP a duna servisio na e entidat di training di polis, sentronan di bario, FFK i tambe e tabata enkargá ku mantenshon integral di kasnan den barionan manera Kustbatterij i aria di Rif. Asina Minister di Tráfiko, Transporte i Planifikashon Urbano sra. Zita Jesus-Leito a duna di konosé durante su intervenshon den Parlamento di Kòrsou ayera mainta.

El a sigui splika ku e problema di último dékada ku FKP a keda konfrontá ta e falta di fondo, pero despues tambe ku no tin kuentanan anual. Esaki a hasi difísil pa por a hasi fiansa. Di otro banda e mester rekordá ku e direktor di FKP konstantemente ta bisa den publisidat ku ta bou di e gobernashon aki el a haña mas tereno pa traha kas.  I den esei e tin rason, pasobra na e momentunan aki na Tera Kòrá, FKP a haña tereno pa traha 204 kas, na Fortuna Ariba pa traha 156 kas, na Montaña 71 kas, i tambe na Barber 30 pida tereno pa traha kasnan pa e klase medio. Esaki ta nifiká ku FKP tin sufisiente tereno ku por traha mas di 450 kas.

Pues gobièrnu a sòru te awor pa FKP a haña sufisiente tereno pa traha kas di pueblo, pasobra ta esei ta e meta di gobièrnu, esta pa pone tereno disponibel. Ta traha kas pa esnan di ménos rekurso ku ta haña supsidio di gobièrnu, pero tambe pa esnan ku ke/por kumpra un kas via di FKP.

Kitamentu di tereno?

Durante e reunion públiko a surgi e pregunta si ta bèrdat ku gobièrnu ke kita tereno for di hende pa bai traha kas di pueblo? E mandatario a deklará ku hamas i nunka e lo krea e posibilidat pa sin mas kita tereno for di hende pa por traha kas di pueblo riba dje.

Loke ku el a bisa ta ku, lo lanta un “Grond- en Vastgoedbedrijf” ku di un forma responsabel bai na atendé ku terenonan pa por otorgá tereno na esnan ku ta bini na remarke, i tambe pa atendé ku personanan ku por manehá propiedat di gobièrnu. E intenshon ta pa e propiedatnan di gobièrnu no bai atras.

Edifisionan ku ta apto pa bende lo bai riba merkado pa bende, i esnan ku ta keda kuné lo mester ta den bon kondishon.