WILLEMSTAD.- Apesar ku Fundashon Kas Popular (FKP)/Wechi Management Group (WMG) ta firma kontrato ku kumpradónan pa benta di kasnan na Wechi konforme un sierto grandura, no ta paga daño i perhuisio na kumpradónan despues ku resultá ku e kasnan ta mas chikí. Asina FKP/WMG ta informá kumpradónan pa medio di nan abogado, Bertie Braam.
EXTRA for di 3 yüni a informá ku e kasnan na Wechi tin hopi problema ku konstrukshon i ku FKP no tin fin di informá kumpradónan ki dia ta kompensá nan pa fayonan ku a surgi den konstrukshon di nan kasnan. Despues di un kantidat di promesa di parti FKP, sin ku a kumpli ku esakinan e kumpradónan a pèrdè tur konfiansa di FKP/WMG.
Den un karta fechá 14 yüni di abogado Berie Braam na nòmber di FKP/WGM ta informá 2 persona ku a kumpra kas na Wechi ku konforme e akta di “erfpacht” ku e propiedat ta pasa pa e kumpradó den e estado den e estado ku e ta na e momentonan ei inkluso defisiensianan ku ta bisto i no ta bisto.
Diferensia den e grandura di e kas manera ku a primintí di traha esaki i e grandura ku realmente a traha e kas, segun Braam no ta motibu pa subi ni baha e preis di benta di e kas manera kumbiní.
E kumpradónan aki a firma un akuerdo di kompra i benta ku FKP i WMG dia 9 novèmber 2022. Dia 6 yüli a pasa e derecho di “erfpacht” pa e tereno ku e kasnan ta trahá riba dje na e kumpradónan.
Despues a sigui diferente korespondensia entre e kumpradónan i FKP/WMG riba tardansa di konstrukshon, problemanan di konstrukshon, promesanan hasí ku no ta kumpli kuné i tambe gastunan èkstra ku e kumpradónan a hasi pasobra FKP/WMG ta duna mal informashon i no ta kumpli ku palabrashonnan hasí.
Un di e problemanan prinsipal pues tabata ku e traha e kasnan mas chikí kompará ku lokual e akuerdo di kompra i benta ta bisa. Eks direktor finansiero, Peter Bongers a mustra riba un di e problemanan serio pa e proyekto di Wechi, esta ku a usa malchinan (“mallen”) robes pa traha e kasnan ku e konsekuensia ku e kasnan a sali 7 centimeter mas kòrtiku for di lokual a kumbiní den e kontrato di benta.
Segun e kumpradónan pa fin di mei FKP a primintí di bini ku un solushon pa e problema aki. Pero kontinuamente ta posponé e fecha ku lo bini ku un proposishon. E último fecha ku a duna tabata 31 mei, pero atrobe no a kumpli.
E doñonan di kas ta desesperá pa e trato ku ta risibí aki i ta teme ku apesar di tur promesa ku e lo dura vários luna i kisas mas ku un aña promé ku konkretamente FKP atendé ku nan riba e problema serio aki pasobra nan a paga pa un kas ku nan no a risibí.
E doñonan di kas ta haña ku FKP ta inventá kualke èksküs pa hustifiká dikon ta drecha e defisiensianan pa kaba òf dikon no ta paga ora pidi rekompensa. “E kas ku nos a risibí al final no ta kuadra ku e kas modelo ku a mustra nos na momento di benta”, ta un di e hopi reklamonan ku EXTRA por a tende.
E kumpradónan no tin konfiansa mas den palabra di FKP debí na hopi kos ku nan ta pasando aden i awor ta resultá pues ku en bèrdat FKP/WMG no ta dispuesto pa paga pa nan fayo den konstrukshon. Na ta bisa tambe ku e propaganda ku FKP a hasi pa e kasnan na Wechi ta engañoso i nan ta bati alarma ku e speransa ku ta hasi algu pa drecha e situashon i tuma esnan ku a invertí nan sèn den e proyekto mas mihó den protekshon.
Foto’s
…Dos propaganda ku ta kontradisí otro. Un ta bisa bo ta haña henter e muraya konstruí i e otro ta bisa ku ta konstruí 2 meter di muraya…