WILLEMSTAD.- Tin bastante problema ku e kasnan di Fundashon Kas Popular (FKP) na Wechi. Esei EXTRA por a konkluí despues di a risibí informashon di vários persona ku a kumpra un di e kasnan aki, pero ta reklamá ku loke nan a risibí no ta loke FKP a kumbiní na promé instante.
E kumpradónan no tin konfiansa mas den palabra di FKP debí na hopi kos ku nan ta pasando aden. Ta bisa ku e propaganda ku FKP a hasi pa e kasnan na Wechi ta engañoso i nan ta bati alarma ku e speransa ku ta hasi algu pa drecha e situashon i tuma esnan ku a invertí nan sèn den e proyekto mas mihó den protekshon.
Na promé lugá nan ta mustra ku ta pagando un suma tur luna pa mantenshon di arianan komun den e proyekto ku tur hende ta hasi uso di dje. Ta trata di por ehèmpel kontròl na entrada di e proyekto, iluminashon anochi, mantenshon di stupi, kayanan i tambe pa tene e aria limpi kòrtando yerba shimaron ku ta krese.
Realidat segun e doñonan di kas ta ku ainda no tin iluminashon na drechi anochi, no a traha stupi pa kana ariba, no ta limpia yerba shimaron ku ta kresiendo pa loko i a pone un “hefboom” improvisá ku un persona ku ta sinta wak ken ta subi e tereno. Esaki segun e doñonan di kas no ta konforme palabrashon i lokual nan ta paga pe.
Eks direktor finansiero, Peter Bongers resientemente a mustra riba un di e problemanan serio pa e proyekto di Wechi, esta ku a usa malchinan (“mallen”) robes pa traha e kasnan. Konsekuentemente e kasnan a sali 7 centimeter mas kòrtiku for di lokual a kumbiní den e kontrato di benta.
Segun e kumpradónan pa fin di mei FKP a primintí di bini ku un solushon pa e problema aki. Pero kontinuamente ta posponé e fecha ku lo bini ku un proposishon. E último fecha ku a duna tabata 31 mei, pero atrobe no a kumpli.
E doñonan di kas ta desesperá pa e trato ku ta risibí aki i ta teme ku apesar di tur promesa ku e lo dura vários luna i kisas mas ku un aña promé ku konkretamente FKP atendé ku nan riba e problema serio aki pasobra nan a paga pa un kas ku nan no a risibí.
Pero ku e kasnan ta 7 centimeter mas kòrtiku no ta e úniko defisiensia ku tin. E kumpradónan tin hopi reklamo mas riba palabrashonnan ku FKP no a kumpli kuné, pero aki tambe ta mira e mesun patronchi, esta nan ta sinti FKP no ta atendé na serio ku e reklamonan riba otro defisiensianan ku e kasnan tin.
E doñonan di kas ta haña ku FKP ta inventá kualke èksküs pa hustifiká dikon ta drecha e defisiensianan pa kaba òf dikon no ta paga ora pidi rekompensa. “E kas ku nos a risibí al final no ta kuadra ku e kas modelo ku a mustra nos na momento di benta”, ta un di e hopi reklamonan ku EXTRA por a tende.
E kumpradónan ta preferá di keda anónimo pa nan no bira víktima di represaya i haña un produkto mas inferior ainda for di lokual nan a paga pe. Un otro motibu dikon nan no tin konfiansa den un pronto solushon ta e kontesta ku a risibí kaba di e direktor nobo di e proyekto di Wechi ku a pidi indulgensia pasobra e ta nobo i no tin konosementu ainda di tur detaye di loke ta pasando.
