WILLEMSTAD - Gerensia di Fundashon Kas Popular (FKP) ta aklará relashoná ku publikashon eróneo ku ta sirkulando último dianan den medio di prensa, rondó di e kompleho di bibienda Hòfi Monchi,.

Kompleho di bibienda konosí bou di e nòmber Hòfi Monchi, ta propiedat di FKP registrá bou di meetbrief nr 240 di aña 1960 na Kadaster.

Preis di hür  di e kasnan na Hòfi Monchi a ser kalkulá konforme lei di Huurcommissie.
E lei aki ta stipulá ku e preis di hür básiko pa aña por ta máksimo 12% di e balor di e bibienda (inkluso preis di e tereno) riba merkado, tumando na kuenta si e balor riba merkado ta fl. 150.000,- òf ménos.

E preis di hür pa e kasnan aki a keda kalkulá na fl.820,- pa luna.
Banda di e preis di hür e kliente a bai di akuerdo pa paga tambe un suma mensual na gastunan di servisio (service kosten). E suma aki ta destiná pa pago di entre otro di gas, mantenshon di e áreanan komun den e kompleho manera kura i e galerianan.

Tin algun di e kasnan aki Gobièrnu a akordá di duna supsidio pa e kliente. Esaki ta trese kuné ku e habitante ta paga solamente un parti i Gobièrnu na su turno pa medio di e supsidio ta paga e diferensia. Di e forma aki e dos pagonan huntu ta forma e preis di hür básiko. Basá riba e entrada di e kliente ta kalkulá kiko e por paga i kuantu e supsidio ku mester keda paga dor di Gobièrnu lo ta.
E preis di hür básiko di e kas mes ta fiho i no tin nada di aber ku e entrada di e habitante.

Por último, FKP no ta kobra niun habitante “afvalstoffenbelasting” Esaki ta kada kliente mes tin di paga na Gobièrnu via di e faktura di Aqualectra. FKP no ta enbolbí den esaki.