WILLMSTAD.- Fundashon Kas Popular (FKP) ta kontinuá den su intentonan pa mas lihé ku ta posibel haña disposishon di e mas ku 19,2 mion ku e tin depositá na Girobank. Den un karta pa minister di Finansa, Javier Silvania FKP ta pidi pa yega na un “vaststellingsovereenkomst” ku gobièrnu pa asina traspasá e claim di FKP riba Girobank di mas ku 19,2 mion florin pa gobièrnu.

E intenshon di e traspaso manera menshoná den e karta firmá pe direktor di FKP, Arthur Con ta ku gobièrnu ta duna FKP e suma depositá na Girobank miéntras ku gobièrnu ta warda te dia ku Giro Settlement Holding (GSH) ta kla pa paga e depósito. Con ta bisa asta ku FKP ta dispuesto pa no tuma e sèn inkluso interes basta ku e suma aki ta bini na fabor di pais.

FKP ta bisa di tin purá di e sèn pa asina por traha aktivamente pa resolvé e nesesidat agudo pa mas kas. Den e karta ta menshoná 4 proyekto spesífiko pa kua tin pèrmit di konstrukshon pa 3 di nan kaba. Ta trata di konstrukshon di 138 kas na Zapateer pa e proyekto di Nos Welita, konstrukshon di 156 kas na Fortuna pariba, 204 kas na Tera Kòrá fase 1 i fase 2 i 132 kas na Bonam.

Segun Con despues di e reunion resien di parlamento a sali na kla ku parlamento ta sostené gobièrnu den su intentonan pa logra lòs e 19,2 mion florin i interes riba e suma aki pa asina atendé ku e eskases di kas trahando komplehonan di bibienda, un proyekto ku FKP ta ehekutá huntu ku gobièrnu. Segun Con ta for di 2019 FKP ta trata di kobra e sumanan depositá i pasa nan pa un otro instituto finansiero.

Pero debí na e atvertensia kontra un “bankrun” i siguransa di Banko Sentral ku tur depósito na Girobank ta sigurá FKP no a sigui mas ku e intenshon di pasa e sèn na un otro banko. “Entretantu e situashon a kambia. Girobank no tin un portafolio mas i ta difísil  pa traha palabrashon ku nan. Apesar ku e banko ta kai bou di e areglo di emergensia i ta pretendé di no ta disponé di e fondonan, lei no nesesariamente ta prohibí pa hasi pago, prinsipalmente si esakinan ta den interes general”, Con ta bisa.