WILLEMSTAD.- E kompania Fly Allways ta reanudá buelonan mayan dia 16 bèk for i pa Sürnam. E buelonan lo keda ehekutá riba djabièrnè. Ta sali 12.30 for di Kòrsou i lo yega Sürnam 4 or di atardi.

Despues di mas di un aña di a para e buelonan pa Sürnam, yunan di Kòrsou ta haña e oportunidat pa bishita e pais bèk via di FAW. Un pais konosí pa su kushina, amabilidat, riunan i watervalnan. Komo ku ta importante pa tur hende por gosa di un fakansi sano i salvo tin algun regla ku mester tene kuenta kuné.

Reglanan pa biaha pa Sürnam;

Mester ta kompleto vakuná. Tur hende ku ta drenta Sürnam mester a pasa sigur tur dos dósis di e vakuna 14 dia promé ku nan biaha. Sürnam ta aseptá solamente vakunanan ku ta akreditá pa WHO.

Parsialmente vakuná i personanan no vakuná; solamente pasaheronan ku ta biaha pa metanan esensial òf repatriá por drenta e pais. E personanan mester haña pèrmit promé pa por biaha pa Sürnam di e ministerio di asuntunan eksterior, internashonal di Sürnam i koperashon internashonal. Por pidi esaki na conza@gov.sr.

Ta eksihí tèst di Covid-19; personanan mester tin un resultado negativo di RT-PCR ku nan ta haña denter di 72 ora promé ku biaha i e mester ta di un instansia akreditá.

Karentena na yegada; pasaheronan kompleto vakuná no tin di bai den karentena obligatorio. Ta pidi pa e pasaheronan ku yega e pais bai 7 dia den karentena boluntario.

Pasaheronan parsialmente òf no vakuná; 7 dia despues ku nan yegada nan ta bai den un karentena ku SHATA ta aprobá riba gastu di e pasahero.

Esnan ku no ta biba na e pais mester tin un seguro di biahe ku ta kubri COVID-19, nan mester a yena un NCCR, Passenger Locator Card i e formulario di Port Health Assessment.