AMSTERDAM.-  E fondo di penshun Pensioenfonds voor overheid en onderwijs (ABP) a kuminsá anunsiá na nan miembronan kaba ku nan ta kalkulá ku e prima di penshun lo subi bastante entrante yanüari 2022. ABP komo e fondo di mas grandi na Ulanda, despues di nan análisis ta kalkulá ku e prima ku awor aki ta 25.9% lo subi i yega 27.4%. Esaki sigur lo tin su konsekuensianan pa tantu e dunadó di trabou komo pa e trahadó.

No ta ABP so pero e fondo PFWZ ku ta kubri interes di e trahadónan den kuido tambe a anunsiá anteriormente ku nan tambe lo oumentá e prima na 2022.

E fondo ta informa ku e desishon final no a kai ainda, pero tur kos ta indiká den e direkshon ei. Na novèmber ta spera di por duna e miembronan kiko ta bira e oumentu definitivo. ABP a subi e prima kaba na 2021 i awor ta anunsiá oumentu pa 2022 i ya kaba tin indikashon ku na 2023 nan lo ke bolbe subi e prima. Un di e motibunan ku tantu ABP komo PFWZ ta duna komo motibu pa kiko nan mester subi prima di penshun ta e interes abou ku nan ta haña i e rendimentu abou di nan invershonnan. EXTRA ta buskando e informashon di fondonan lokal i lo trese esei pa nos lesadónan.

 

LAGA UN KOMENTARIO

Please enter your comment!
Please enter your name here