WILLEMSTAD.- Direktor di Banco di Caribe Fons Simon djamars último a bisa EXTRA ku ‘semper nos porta ta habri pa tur kliente pa habri kuenta ku nos. Pero tur hende tin ku kumpli ku nos kriterionan i nos reglanan pa nan por bin na remarke di un kuenta koriente.’ Ku esaki Simon ta reakshoná riba notisia ku a sali djamars último ku Girobank ta urgi tur kliente pa lanta tur fondo disponibel inmediatamente. A korto plaso lo terminá tur servisio bankario, Girobank a bisa.
Fons Simon a bisa ku e no por bisa for di adelantá si hende ta bin na remarke pa habri kuenta na Banco di Caribe si òf no. ‘Ku kada hende nos tin ku hasi nos ‘screening’, wak tur e dokumentonan i wak si tur papel ta na òrdu. Basá riba esaki nos ta tuma nos desishon. Kliente nobo tin ku kumpli ku nos kriterio i nos rekisitonan. Pero tur hende ta bon biní pa traha un sita pa habri kuenta na Banco di Caribe.’
Relashoná ku hende penshonado, Simon ta bisa ku: ‘Nos tin ku keda para riba nos kriterionan. Tin mas, loke tin asina ta ku komo Banco di Caribe nos tin un kantidat hopi grandi kaba di penshonadonan. Esaki ta pone ku tur fin di luna, ora tin di kobra, semper tin reinan largu di hende penshonado.’
Segun Simon Banco di Caribe tin ku wak kuantu penshonado mas e banko por tuma komo kliente. ‘Si no, nos ta krea un problema pa nos mes i pa e klientenan ku tin ku para hopi tempu kaba promé ku nan por drenta i hasi nan transakshon.’ Pero na mesun momentu Simon ta bisa ku tur hende ku awor tin kuenta koriente na Girobank, ora nan ke bin Banco di Caribe i ora nan ta kumpli ku tur rekisitonan, nan ta bon biní.
Relashoná ku situashon aktual na Girobank Fons Simon a bisa ku komo direktor di Banco di Caribe e no ta preokupá tokante situashon na Girobank mas. ‘Nos a komprendé ku tur hende lo haña nan sènnan bèk. Manera ta kustumber den mundu finansiero nos lo sigui desaroyonan na otro bankonan sigur. Nos tur ta pendiente ki kambionan ta bin. Pero preokupashon e no ta.’