KRALENDIJK/WILLEMSTAD.- Awe promé di mart, Extra ta kumpli 45 aña di eksistensia. For di aña 1969, luna di aprel, ya kaba Eddy Oleana, fundadó di Extra, kier a lanta un korant diario, pero e akontesimentunan di 30 di mei e aña ei a stroba realisashon di su plan. Esaki Eddy Oleana mes a indiká den e promé edishon di Extra 45 aña pasá. Su plan tabata pa saka un korant na ingles, spesialmente pa turista.

Intenshon tabata pa repartí e korant aki grátis na hotèlnan. Eddy Oleana mes a skirbi: "E kalamidatnan di 30 di mei 1969 sinembargo a pone ku tur e plannan aki a keda paralisá."

Revista

Oleana seguidamente a editá un revista ku tabata sali semanalmente yamá 'Semanario Artístico', den kua únikamente tabata duna informashon riba e mundu farandulero.

Den transkurso di aña 1975 e plannan pa yega na un propio korant diario a bolbe kuminsá haña e ‘swing' nesesario, pa usa un palabra di Oleana mes den e promé edishon di Extra.

Despues ku su kontrato na e korant Nobo a terminá dia 1 di yanüari 1976 por a haña mas oportunidat pa por a keda kristalisá. Oleana: "Trabounan intenso durante e dos lunanan aki a keda koroná ku e edishon djawe."

Forsanan grandi

Den e artíkulo ku a sali riba e promé página di Extra ta skirbí: "E redakshon di Extra ta disponé di un forsa hopi grandi den tantu Eddy Oleana mes komo Mike Oehlers, kende ta un dama ku a dediká bastante aña den periodismo na Antia. Huntu ku e dos personanan aki Taffy de Jongh jr., dinámiko hóben i deportista di primera, lo bai yena kolumnanan deportivo diariamente ku informenan deportivo."

Den e tempu ku Extra a kuminsá, korantnan tabata funshoná mas tantu riba abono i entrega di korant kas pa kas, loke tabata operashon hopi duru i kostoso. Bendementu di korant riba kaya no tabata asina komun.

P'esei tambe den kuminsamentu Extra a forma un ekipo di distribushon di bastante persona ku lo mester a hasi entrega di e korant na kasnan for di den oranan di mardugá, di manera ku e abonadonan por a lesa nan korant ku notisianan fresku for di mainta tempran. Pero tabatin benta lòs riba kaya tambe.

No pa kibra!

"Extra no a ser fundá pa kibra ningun korant, manera a insinuá infantilmente. Extra ta un proyekto ku mi a kuminsá realisá for di aña 1969 i ku a kulminá awe". Esaki Eddy Oleana, fundadó di Extra, a skirbi den e promé edishon di e matutino aki dia 1 di mart 1976.

E dos korantnan diario na papiamentu na momentu ku Extra a lanta na 1976 tabata La Prensa, ku tabata eksistí for di 1928 kaba, fundá pa Jorge B. Suares, i Nobo di Carlos Daantje. Nobo a sali dos aña promé ku Extra. Eddy Oleana tabata traha pa Nobo bou di direkshon di Carlos Daantje.

Eddy Oleana den e promé editorial aki a sigui splika: "E maneho ku redakshon di e matutino aki lo hiba ta unu kaminda nos lo no basilá ningun momentu pa trese algu pa dilanti ku ta kontra interesnan di henter e pueblo aki. Paisnan, islanan, den sentido bon i sentido malu, tin e periodismo ku nan meresé. E por wòrdu drechá únikamente di akuerdo ku e pueblonan progresá den desaroyo i moralidat."

Tambe Eddy Oleana a asentuá: "Extra no tin i lo no tin tampoko afiliashon polítiko. Por sierto ku en espesial henter nos personal di redakshon ta a-polítiko. Ta p'e motibunan aki mes nos tin asina bon relashon ku tur, mi ta ripití, tur eksponente di partidonan polítiko. Si un gobièrnu ta hibando un maneho bon, e ta haña un 'pluimpje' serka Extra, pero si nò.... prepará! Interes di e pueblo aki, pa nos, ta tur kos."

Gran maestro

Fundadó di Extra, Eddy Oleana, a lamentá ku su tata Jose Lorenzo Oleana, kende e ta deskribí komo su gran maestro, no a mira e promé edishon di Extra ku a sali riba merkado dia 1 di mart 1976. Jose Oleana a fayesé dia 8 di novèmber 1975. Tantu Eddy Oleana su tata komo su mama tabata boneriano, hendenan di Antriol.

”Ta ku húbilo den mi kurason, ku awe 1 di mart 1976, mi por a mira un di mi soñonan di mas ambisioso bira realidat, pero ne otro un banda ku un tristesa profundo mi tin di konfrontá e realidat, sin mi maestro mas grandi den e mundu aki; .... mi papa, Jose Lorenzo Oleana, kende a fayesé aña pasá, dia 8 di novèmber", Eddy a skirbi den e promé número di Extra.

"Ku e determinashon mi dilanti di sigui su konsehonan semper, kada mainta for di mi kama, mi ta memorá su palabranan: "Fayo òf frakasonan nunka lo por poderá di mi, tanten ku mi determinashon pa triunfá ta sufisiente fuerte. 'Mi no mag faya nunka', Tabata entre otro un frase di e gran hòmber aki. Awor ku mi a yega pa konfrontá e realidat, despues di tantu aña di labor fuerte di dia i anochi ya kaba mi por nota ku soñamentu a terminá i ku lo mi tin di hasi uso di tur lokual ta na mi alkanse pa kontinuá ku e lokual mi a kuminsá awe."

"Mi tin sigur, ku huntu ku  mi, e staf redakshonal di Extra ta konsiente di nos responsabilidat ku nos a tuma riba skouder pa guia e pueblo aki. Den Mike Oehlers, Taffy de Jongh jr., i fotógrafo Ruben Simoons, mi tin e garantia aki. Pero no ta e staf redakshonal so. Tur e sobrá personanan ku ta forma parti di Extra Productions, tantu di atministrashon, distribushon komo di benta, a pone pleno konfiansa den mi persona, pa por  realisá e proyekto aki. Ta lógiko ku ta masha difísil pa desepshoná nan."