WILLEMSTAD.- Ayera minister di VVRP sra. Zita Jesus-Leito a presentá tur dokumento riba mesa pa mustra ku Baoase Resort for di 1998 a kuminsá kumpra kas den Winterwijkstraat ku ta keda pega ku e laman i tambe ku nan tin tur pèrmit pa traha tur loke ku tin aktualmente na e resort.

Minister Jesus-Leito a bisa ku e kier trese klaridat den e kaso aki, pasombra tin hopi konsternashon despues ku a manifestá i a basha porta di Baoase abou. Tambe mester kontesta e pregunta, si e resort a traha kos di forma ilegal si of no.

E mandatario a indiká ku na 2 yüni 2017 el a bira minister di VVRP. Loke ku e por a tuma nota di dje ta ku tur proyekto hotelero na Kòrsou ta keda na kosta, pega ku laman.

Minister Jesus-Leito a presentá e historia ku dokumento pa mustra tur e pèrmitnan ku Baoase a haña den añanan ku a transkurí:

Na 1983, gobièrnu di Antia a duna pèrmit na e persona A. “Dutch” Schrier pa traha un “pier met steiger” na e kosta dilanti di Winterwijkstraat kaminda e kas di Schrier tabata (pues den laman). Paso Schrier tabatin boto p’e mara na e sitio aki; 1998 Flamingo Ontwikkelingsmaatschappij NV (Baoase) a kumpra Wintserwijkstraat 1 i 2; 2001 DROV (awor ROP) a duna konseho positivo pa proyektonan turístiko na e parti di e kosta aki alrededor di Winterwijkstraat den forma di parke di bùngalo; 2002 Baoase a kumpra Winterwijkstraat 4.  Tur e adrèsnan ku Baoase a kumpra ta kas di kurasoleñonan ku tabata biba na e sitio enkuestion.

Na 2004 Baoase a risibí pèrmit pa traha 3 bùngalo; 2005 Baoase a haña pèrmit di DROV pa traha 5 kas riba terenonan ku nan a kumpra; 2006 Baoase a kumpra 2 parsela na kosta bou di kua Drielstraat 3 ta kai i ta di Schrier; 2007 Baoase a risibí pèrmit pa traha “golfbrekers”. E pèrmit ta enserá tambe pa remodelá e “golfbrekers” eksistente i drecha e área di laman.

Minister a indiká ku aña 2007 ta unu hopi importante, pasombra aki Baoase a haña e base pa traha riba loke ku nan a kumpra i e “golfbrekers” nan.

Na 2012 Baoase a risibí pèrmit serka ROP pa traha 5 “strandhuizen” i un restorant riba e terenonan ku nan a kumpra; 2014 minister di VVRP a emití den erfpagt ekspanshon di e terenonan ku ya nan a kumpra anteriormente; na 2016, Baoase a hasi petishon na Minister VVRP e tempu ei, eks minister Camelia-Romer, kaminda e hèki ta awor den erfpagt; 22 yüni 2018 minister Jesus-leito a duna Baoase pèrmit pa posishoná e hèki  atraves di un karta ofisial ku ta indiká ku a bai di akuerdo ku e proposishon pa nan risibí e tereno den erfpagt.

Minister Jesus-Leito a kuestioná ku dia 25 yüni e ta haña karta di e siudadano Koko indikando ku a duna Baoase dos siman pa kita loke ta ilegal. Segun e mandatario esaki no ta forma di aktua. Un siudadano no por yega disidí, i pone ultimatum pa hende. Si tin algu ku e ta kontra tin lei, e siudadano tin kaminda pa kana. P’esei dia 16 ougùstùs minister ta manda karta pa sr. Koko pa bisé ku loke e ta papia no ta korekto. Pero e mail aki ta bai kai den “junkmail” di Koko i e no ta mir’e. Riba mesun fecha minister ta konfirmá na Baoase su desishon di dia 22 yüni via di un Desishon ministerial (MB). Dia 23 di ougùstùs 2018, Baoase a pasa e akta pa ekspanshon di erfpagt konforme e MB di minister di VVRP.

Segun e minister, el a bin haña karta di eks minister Balborda ku ta bisa minister Suzy Camelia-Römer ku Baoase a pidi  e pida tereno i el a honra e petishon aki. Ku e presentashon aki i bon dokumentá, minister ke a mustra ku Baoase tin tur pèrmit i no tin nada ilegal.