WILLEMSTAD.- Awe nos ta algun aña mas aleu i te ainda no a deshasí òf desmantelá e edifisio unda ántes tabatin e fábrika di Pepsi Cola na Zeelandia. Un edifisio ku tin su peligernan kuné pa motibu ku parti di su konstrukshon tin material ku ta kontené asbèst. Investigashonnan ku a ser hasí den e edifisio aki ta konkluí ku tin presensia di asbèst. Gobièrnu ta na altura di esaki i a keda di hasi e trámitenan pa kita i deshasí di tur loke ta kontené e material peligroso i kanseroso aki. Pero esei ta loke EXTRA por a komprondé for di tres aña pasá komo resultado di un investigashon ku nos mes a hasi.

T’asina ku pa basta tempu kaba e edifisio aki ta kompletamente bandoná i dos aña pasá nos a tuma nota di un rapòrt ku a ser hasí dor di un laboratorio establesé na Ulanda (M.M. Lab) ku ta spesialisá den midimentu di e supstansianan aki i den su relato di análisis e laboratorio a konstatá ku presensia di asbèst. Análisisnan ku a ser hasí riba e plachinan di dak, popularmente yamá “eternit” a detektá presensia di “Chrysotiel”. Ta papia aki di 10-15% di e material. E investigashon ta data di òktober 2017.

Segun normanan ku ta ser apliká, tur loke ta bou di 0.1% den e investigashon ta nifiká ku no tin presensia di asbèst. Pero den e kaso aki tin kuestion di entre 10-15%, loke ta nifiká ku e material dañino aki su presensia ta opvio.

Eksperto:

EXTRA a tira lus riba e kas aki for di tres aña pasá i a papia ku un eksperto yu di Kòrsou establesé na Hulanda, Dr. Byron Martina, i el a splika ku, no opstante e ta un virólogo, pero a base di loke e por a lesa den e rapòrt definitivamente tin presensia di asbèst.

E tempu ei tambe EXTRA a tene kontakto ku un alto funshonario di e Servisio pa Maneho di Medio Ambiente i Naturalesa, i e persona aki a duna nos un splikashon amplio i detayá kon henter e proseso aki ta kana te ora ku deshasí di e asbèst. El a splika ku, si tin ophetonan of materialnan di konstrukshon ku ta kontené asbèst, si esaki keda den e forma sólido ku e ta e no ta representá un peliger inmediato. Pero na momentu ku mishi kuné, si mester bai zag, bora etc. ku ta destruí loke ta sólido, i sigur si e aktividatnan ei ta polvorisá un ke otro, e ta representá un peliger pa salú di hende.

E tempu ei e focus tabata riba e edifisio aki di Pepsi kaba i asta a kuminsá hasi e trámitenan pa pone e doño na altura dje pasonan ku mester entamá pa deshasí dje material.  Pero no ta sin mas ta yega i kita plachinan benta afó, ya ku mester formulá henter un plan pa determiná kon ta deshasí dje material.