AMSTERDAM.- For di awe djárason TUI no ta bende pakete di buelo pa Kòrsou. E desishon aki, despues ku ministerio di asuntunan di eksterior di Hulanda ayera a pone nos den kódigo oraño, debí na e kantidat haltu di kasonan di Corona vírus riba nos isla.
TUI ta aserká tur e klientenan ku a hasi reservashon pa Kòrsou, ku nan tin komo alternativa Aruba, Bonaire òf Islanan Canario pa bishitá.
Na e momentu aki tin 1900 biahero di TUI na Kòrsou. Ta trata aki di vakashonistanan ku tin reservashon di pakete di biahe. Solamente un grupo chikí a kumpra ticket so pa bin Kòrsou. E vakashonistanan por terminá nan vakashon i en prinsipio nada lo kambia ku nan buelo di regreso manera e ta planiá. E biaheronan ku ta na Kòrsou aktualmente ya a kuminsá haña un informe personal.
“Nos ta ofresé solamente vakashon na destinashonnan ku tin kódigo bèrdè òf hel komo konseho di biahe. Nos lo no ofresé pakete di biahe pa Kòrsou. E klientenan ku ya a hasi n reservashon pa Kòrsou den próksimo simannan lo keda informá di e desishon aki. Ora nan ta deseá, nos ta buska un alternativa pa nan”.
E posibilidatnan tòg ta keda limitá pa destinashonnan ku solo ku tin un konseho di biahe koló hel, entre otro Bonaire, Aruba òf islanan di Gran Canario, Tenerife, Lanzarote i Fuerteventura. Esnan ku no ke kambio di nan destinashon di vakashon òf fecha di biaha, lo risibí nan sèn di biahe bèk.
Manera ariba indiká, ministerio di asuntunan di eksterior di Hulanda ayera a emití kódigo oraño pa Kòrsou. Esaki dor di e oumento di kasonan di Corona vírus na Kòrsou ku ketu bai ta haltu i pues nos ta un pais di riesgo. Na momentu ku e koló kambia di hel bai kódigo oraño, ta solamente si ta nesesario por biaha pa Kòrsou.
RIVM no ta haña ku ta nesesario pa biaheronan regresá dirèkt awor aki.
Si ta sali for di Kòrsou pa bai Hulanda, na Hulanda tin di keda 10 dia den karentena na Kòrsou.
Sinembargo a base di e desaroyonan na Kòrsou lo aktualisá e informe.