WILLEMSTAD. - Tur dia Gobièrnu ta yora ku no tin sèn, pero a bira un kustumber ku sèn ta wòrdu derochá sin ku nèt nada bin afó. EXTRA tin informashon verídiko ku for di luna di mei 2020, telefònnan di bode ku shofùrnan di minister ta será.

Konforme nos fuente t’asina ku ta un kustumber ku gobièrnunan no ta gusta nada ku yama pagamentu òf na bon Papiamentu no ta paga nada ku no ta kumbiní nan. E telefònnan aki ta di gran importansia pa e bodenan i tambe shofùrnan ora ku mester hasi yamada di trabou. Aktualmente ora ku bodenan sali riba kaya, no sa mas unda nan ta si no ta te ora ku nan bin paden.

Algun siman atras un shofùr di minister a yega te na kantor pòrnada. E minister no por a komuniká kuné debí ku nan no tin su number priva.

Semper ta riba e telefòn di trabou a yama i minister a lubidá mes ku no a paga UTS/FLOW for di mei,  ku e telefònnan tur ta será.

E kolmo di tur esaki ta ku tur luna e kontrakt a sigui kore normal. Esaki ta nifiká ku e gastu a bira mas haltu i gobièrnu mester paga esaki na bon òf na malu.

E pregunta ta, kiko Sektor Direktor i Sekretario General nan ta hasi. Kon por ta posibel ku ta laga e gastu kore tur luna bai i no ta hasi uso di e telefònnan ku mester paga nan tòg.

Ta manera bieunan ta bisa, ‘no ta bo saku tòg, ki bo tin kunes’.

Un fuente den BPD a konfirmá pa EXTRA ku en bèrdat tin un saldo habrí na UTS/FLOW for di mei ku no a wòrdu pagá. Ku kontrakt mester wòrdu pagá, aunke ku no a hasi uso di e telefònnan.

Esaki ta keda konsiderá komo un situashon tristu, kon gobièrnu ta keda sin paga, pero e gastu ta sigui kore manera nada no a pasa.

Segun nos fuente a sigurá nos ku Minister en kuestion ta debidamente na altura di e situashon aki.