No tin fecha pa e gabinete nobo huramentá

WILLEMSTAD.-Algun minüt pasa formador Chester Peterson a entrega su relato final na su ekselensia gobernador di Kòrsou. E relato aki ta kontené e nòmbernan di e kandidatonan pa minister ku formador ta presentá pa asina nan por keda huramentá serka gobernador komo e próksimo ministernan di e pais aki.

Formador Peterson despues di baha trapi di palasio di gobernador a duna di konosé ku tin algun detaye ku mester regla ainda promé ku huramentá e ministernan nobo. El a menshoná entre otro ku tin persona ku ta den Parlamento i ku mester retirá i tin miembronan nobo ku mester drenta Parlamento tanten pues tin asuntunan ku mester kaba di regla. Pa loke ta trata e fecha pa huramentá e formador a bisa ku esei ta na prerogativa di gobernador.

E puesto di minister di hustisia i di minister di ekonomia lo bai kai bou di otro ministernan tanten te ora e dos partidonan haña un kandidato adekuá. Peterson komo abogado no ta polítiko i no ta interesá di bira polítiko tampoko i p’esei si puntr’e pa okupá un puesto di minister e lo ninga.

For di palabranan di e formador por a konkluí ku e investigashon ku servisio di inteligensia di Kòrsou (VDC) a hasi a tuma mas tantu tempu ku a spera. Mas detaye den edishon di EXTRA.