For di 2016

WILLEMSTAD.- Fundadó i alabes èks minister i parlamentario pa partido MFK, Gerrit Schotte, na 2016 a pidi presensia di minister di Desaroyo Sosial, Labor i Bienestar (SOAW) den un reunion di parlamento pasobra ta e minister akí ta esun responsabel pa maneho di fondo di aov/aww ku ta e fondo di penshun di behes i penshun de wérfano. Frakshon di MFK na 2016 a pidi un reunion riba e fondo di aov/aww pasobra e tempu ei e fondo, segun e frakshon, tabatin algun aña ta drei ku défisit apesar ku a hisa edat di penshun.

E karta ku petishon pa reunion di parlamento tabata firmá pa 3 miembro di e frakshon di MFK, esta Schotte èks parlamentario i aktual minister di SOAW pa MFK, Charetti America-Francisca i èks parlamentario i minister pa MFK, Jacintha Constancia. Den e karta e frakshon ta bisa: “Presensia di minister di salubridat kual ta e minister enkargá ku SVB (Banko di Seguro Sosial) ku ta e entidat ku ta manehá e fondonan aki ta nesesario i tambe Minister di SOAW ku ta responsabel di e maneho di aov/aww na e reunion akí pa asina miembronan di parlamento por debatí ku e ministernan riba e tópiko aki. Nos ta pidi presidente di parlamento pa ekstendé un invitashon na e 2 ministernan konserní.”

Esaki ta hustamente loke èks minister di SOAW pa PNP, Ruthmilda Larmonie-Cecilia, tambe a deklará resientemente, esta ku a base di repartishon di kartera por disidí di pone SVB bou di kualke ministerio ku ke, pero pa lei ta e minister di SOAW ta responsabel pa e fondo i ta e so por laga hasi kambio den e lei. Den e ordenansa di lei bou di e kabes “Algemene Bepalingen” kapítulo 1, artíkulo 1, ta stipulá ku ora den e teksto di e lei ta referí na minister ke men e minister di Desaroyo Sosial, Labor i Bienestar (SOAW).

Algu pues ku ta bon konosí den seno di MFK pa hopi aña kaba mirando kon e frakshon mes for di 2016 ta menshoná esaki den un petishon pa un reunion públiko. Sinembargo, na 2025 ta diskutí tur dia, prinsipalmente riba retnan sosial, riba dikon èks minister(nan) di salubridat no a hasi kambio den e lei di aov. Entretantu bou di minister di Salubridat, Javier Silvania, a lanta un grupo piloto pa yega na reforma di e fondo di aov/aww.

E diskushon riba penshun di behes a lanta sinembargo riba e petishon pa gobièrnu aktual kumpli ku e lei di aov/aww eksistente ku ta indiká ku ta indeksá penshun di behes a base di kresementu ekonómiko real. For di 2022 Kòrsou a registrá 3 aña konsekutivo di kresementu ekonómiko real. Algu ku lider polítiko di partido MAN-PIN, Giselle Mc William, a mustra na vários okashon riba dje.

Banda di e indeksashon aki tin un inisiativa di lei ku a bai parlamento pa alabes trese kambio den e lei di aov kaminda den futuro no ta indeksá esaki mas a base di kresementu ekonómiko real, pero a base di oumento di kosto di bida, ku otro palabrá a base di e grado di inflashon.