A manda karta pa direktiva di partido

WILLEMSTAD.- Frakshon di MFK den parlamento no ke sigui traha ku parlamentarionan di PNP, Sheldry Osepa i Gwendell Mercelina loke ta kousa pa koalishon di MFK i PNP a kai. E desishon pa partidonan bai for di otro a kai djárason 21 ougùstùs mainta.

Den e karta firmá pa tur 9 miembro di parlamento pa MFK ta bisa ku mirando e akontesimentunan di último dianan, inkluso den parlamento kaminda parlamentario Osepa a hasta yama MFK partido inkonfiabel i parlamentario Mercelina ta tilda MFK di tur sorto di kos, frakshon di MFK no ta dispuesto mas pa sigui traha den koalishon ku e 2 personanan aki.

Lider polítiko di PNP, Ruthmilda Larmonie-Cecilia a haña e karta karta di partner di koalishon MFK djárason mainta for di man di promé minister Gilmar ‘Pik’ Pisas (MFK). Esaki tabata motibu pa Larmonie-Cecilia a Sali mesora for di e reunion di Konseho di Minister ku tabata andando i alabes indikando ku PNP lo no por sigui partisipá den gobièrnu bou di e kondishonnan aki.

Mesora e lider polítiko a yama un reunion urgente na Kas di Pueblo riba Winston Churchillweg ku sobra ministernan, miembronan di parlamento, direktiva i sobra prominentenan di partido. Den e reunion aki e desishon definitivo a kai ku e ministernan di PNP lo bai entregá nan retiro na gobernadó a base di e último desaroyonan aki den seno di koalishon.

E motibu prinsipal pa e último klèsh entre MFK i PNP ta e reunion di Komishon Sentral di parlamento tumultuoso ku a tuma lugá djaluna último riba e desishon di minister di Finansa Javier Silvania (MFK) pa na yanüari 2023 duna eksonerashon na debe di impuesto pa 3 miar florin. Parlamentarionan di PNP,  Osepa i  Mercelina tabata krítiko den nan preguntanan pa minister Slivania durante e reunion.

Entre otro e Osepa a pidi pa haña klaridat riba e base legal pa e desishon di Silvania i tambe el a referí na e veredikto di Korte di Apelashon ku a bisa ku e minister, pa medio di un publikashon riba ret sosial defakto a duna eksonerashon di tur debe di impuesto di 2017 i promé, sin tene kuenta ku niun kriterio ku normalmente ta tene na konsiderashon ora evaluá un tipo di medida asina.

Mayoria

Informashon mas aleu ta indiká sinembargo ku ya kaba partido MFK tin kontakto ku partido KEM i miembro independiente di parlamento, Zita Jesus-Leito pa leim e koalishon i huntu forma un mayoria nobo di 11 den parlamento. Lider polítiko di KEM, Michelangelo ‘Lo’ Martines a indiká for di ayera ku e partido semper ta kla pará pa goberná huntu ku partido MFK.

Den reunion djaluna Martines a bisa ku e no ta mira nada robes ku minister Silvania a hasi i a elogiá e minister pa su trabou i plannan pa duna Fundashon Kas Popular insentivonan fiskal pa asina yuda traha mas kas.

Foto: