Minister no a manda dokumentonan ku parlamento a pidi

WILLEMSTAD.- Konseho di minister di Finansa, Wim Nijdam den kurso di siman pasá a informá frakshonnan di MFK i PNP riba e proseso i desishon ku a kai pa duna eksonerashon di pago di debe di impuesto for di 2017 i promé. Esaki den kuadro di e preparashon di e frakshonnan di koalishon pa e reunion di Komishon Sentral di parlamento riba e tópiko aki ku ta planiá pa sigui awe.

E frakshonnan a risibí informashon den seshonnan separá. Segun EXTRA a komprondé e splikashon a konsentrá riba e proseso ku a kana pa yena na e toma di desishon pa na yanüari 2023 a eksonerá mas ku 3 miar florin na debe di impuesto i ku a indiká ku ta Ontvanger mes a indiká ta kua te a suma ku ta kere ku por eksonerá (“buitenvordering stelling”).

Lider polítiko di Partido Nashonal di Pueblo (PNP), Ruthmilda Larmonie-Cecilia den deklarashon pa EXTRA a bisa ku pa PNP no por aseptá si a aktua pafó di leinan di kontabilidat pa asina duna eksonerashon di debe di impuesto. Tambe el a indiká ku frakshon di PNP lo ta krítiko durante e reunion.

Frakshon di partido PAR for di 7 ougùstùs a pidi tur dokumento relevante inkluso e instrukshon formal di minister Javier Silvania pa duna eksonerashon di mas ku 3 miar florin na debe di impuesto. E frakshon ke tuma nota e mes di eksaktamente kon kosnan a kana, ta ken a traha kua konseho i dokumento, si esakinan ta karga aprobashon di Konseho di Minister i si e desishon ku al final a ehekutá ta konforme loke Konseho di Minister a aprobá.

Djabièrnè 17 di ougùstùs e frakshon a manda un karta di rekordatorio pa presidente di parlamento, Charetti America-Francisca (MFK) pa kòrda e Silvania entregá e dokumentonan na tempu pa asina parlamento por hasi su trabou di kontrolá gobièrnu di forma responsabel. Te ku ayera ainda Silvania no a manda e dokumentonan ku a pidi pa parlamento.

Lider polítiko i lider di frakshon di PAR, Quincy Girigorie ta bisa ku sin e dokumentonan kontinuashon di e reunion di awe, djaluna 19 ougùstùs no tin sentido i ta p’esei el a pidi pa haña e dokumentonan pa mas tardá 13 ougùstùs último pa parlamento por prepará i hasi su trabou pa kontrolá gobièrnu manera debe ser. Haña e dokumentonan djis promé ku reunion no ta aseptabel tampoko i Girigorie ta enfatisá ku bou di tur sirkunstansia mester bini un reunion públiko riba eksonerashon di debe di impuesto, sea ku risibí e dokumentonan pidí òf laga.

Konseho Sosial Ekonómiko (SER) den su konseho riba un proposishon di lei ku Silvania a manda parlamento ta konkluí ku minister di Finansa ni den su ròl komo legisladó i ni komo ehekutivo por a tuma e desishon legítimo bálido pa duna eksonerashon di pago di debe di impuesto. Ta bin aserka ku e minister no a tene su mes na e práktika fiho na Kòrsou pa duna un instrukshon (“aanschrijving”) ora ta tuma medidanan temporal pa sania debe di impuesto antisipando riba un areglo legal.

Tambe SER ta konkluí ku Silvania a tuma medida pa sania debe di impuesto sin un base hurídiko. E ponensia aki segun SER ta haña sosten tambe den e intenshonnan di Silvania pa formalisá su pakete di medida ku el a tuma pa medio di e proposishon di lei ku el a manda resien pa parlamento.

Foto:

...Javier Silvania...