Freewinds tin Kòrsou komo su base pa kasi 32 aña

E aña aki Freewinds ta kumpli 32 aña ku e tin Kòrsou komo su base. E barku mes tin 51 aña i a keda konstruí na 1969 i Freewinds a tum’é na 1986 i for di einan ta nabegá. For di un prinsipio Kòrsou ta e base pa Freewinds. Na yüni 1988 e barku a keda ofisialisá na Kòrsou i di aki a hasi nan promé biahe. Nos ta kòrda riba e biahe aki, a sali for di haf di Kòrsou ku un grupo di invitado i a dal djis un keiru i bin bèk. Nos di EXTRA tambe a forma parti di e  grupo e tempu ei. Di e fecha ei bin te awe a hasi diferente kambio na interior di e barku. E renovashon a keda hasí 2 bia i e último bia na 2008/2009. Esaki lo ta e último renovashon i p’esei nan a skohe pa un remodelashon ku ta kana ku tempu. Manera Kenneth ‘Ken’ Weber e ‘port captain’ a yam’é, e ta algu ‘Timeless’ i klásiko. Ku mantenementu nan ta sòru pa tene bunita. Te ainda no ta intenshon pa kambia e barku. Nan ta kontentu ku e barku aki segun Ken Weber a splika den e entrevista ku Djasabra.


Sientology….

Freewinds ta un barku krusero i ta unu úniko, nan ta pertenesé na un organisashon di misa Sientology. E ta un organisashon internashonal ku tin miembronan rònt mundu. Di tur parti tin hende ta subi e barku pa tuma parti na seminario i konferensianan i tambe por bai riba un fakansi. Esei ta loke nan ta hasi último 32 aña. I meskos ku kualke otro hotèl i barku krusero, tin diferente hende ku ta subi e barku for di rònt mundu. I okashonalmente nan ta haña  hendenan konosí entre otro músikonan ku ta presentá i asta sòru pa eventonan di  rekoudashonnan di fondo. Un di nan ku Ken Weber a menshoná ta Chick Corea. Chick Corea ta konosí pa su músika di Jazz.

 

Freewinds por karga 500 hende total….

E barku por karga 300 pasahero. Tin restorant, lounge, sala pa duna presentashonnan, pisina, espasio di pelíkula, libreria. Total nan tin algu mas ku 200 miembro di e  tripulashon i total den kareda di 500 hende lo por ta riba e barku. Nan ta traha ku un total di 30 diferente nashonalidat riba e barku asina Ken Weber a splika.

 

Kontribuí na komunidat….

Freewinds siendo parti di Kòrsou ta sòru tambe pa kontribuí na komunidat di Kòrsou. Nan ta hasi hopi aktividat di rekoudashon di fondo i mayoria bia den forma di músika. Nan ta traha ku músikonan lokal i kual sea e organisashon ta bende e entrada i Freewinds no ta kobra nada pa e fasilidatnan ku e konsiertonan por hasi uso di dje. Un kantidat grandi di hende ta subi e barku aki anualmente, no solamente na Kòrsou pero den Karibe kaminda tambe ta sòru pa eventonan. Ken Weber a menshoná ku nan a yega na 1.3 mion dòler pa organisashonnan di karidat den region den último añanan.

 

Diferente programa….

Ken Wever a bisa ku nan tin diferente programa ku no ta solamente e rekoudashonnan di fondo i aktividatnan di músikonan, pero diferente enkuentronan sosial, ku nan ta envolví e pueblonan den dje. Programanan pa konsientisá riba moral, étika, droga, edukashon, asuntunan di derechi humano. Freewinds ta sostené e programanan aki ya ku na ta toka netamente e tópikonan importante pa un i tur.

 


E kaminda pa felisidat….

Un di e programanan sosial ku Freewinds tin ta “e kaminda pa felisidat”. No ta un programa religioso ni tin nada di aber ku polítika. Loke ta úniko di e programa aki ta ku nan tin e na papiamentu tambe. E por keda usá den skol, den gruponan di komunidat, negoshi, den prisòn. E ta siña e balornan básiko di moral. E ta skibi i tambe visual. E ta balornan ku hende a krese kuné pero parse ku a bai pèrdí den e sosiedat awendia, Tur dos mayor ta traha awendia i ta laga hopi bia e edukashon pa e skol so. Pero esei no mester ta e kaso, ta e mayor tin di siña e mucha kiko ta bon i malu i e balornan básiko. Tambe por us’e den negoshi pa siña hende e balornan ora nan ta traha pa bo. E moralnan étiko. Nan ta traha ku diferente prisòn den Karibe i tin e buki aki na diferente idioma; 120 idioma total e buki aki a keda tradusí den dje i por sirbi tur komunidat.

Por haña mas informashon di e programa aki riba  www.thewaytohappiness.org

 

 

 

SHARE

LEAVE A REPLY