WILLEMSTAD.- Outoridatnan di Sint Lucia a wanta e barku Freewinds i e no por sali for di e isla despues ku a konstatá un kaso di sarampi na bordo. Ta hasi esfuerso pa e barku sali for di haf di Sint Lucia awe. Sarampi ta hasiendo estrago na diferente parti di Karibe, Latinoamérika i Merka últimamente. Na Merka ya kaba a konstatá mas ku 700 kaso e aña aki.

Freewinds ta un barku operá pa e sekta ku ta yama su mes Scientology i tin siguidónan rònt mundu. Un bosero di gobièrnu di Sint Lucia a bisa ku a pone e 300 biaheronan huntu ku miembronan di tripulashon den karentena for di djaluna despues ku un miembro femenino di e tripulashon a tèst positivo pa sarampi. Sarampi ta un malesa ekstremadamente kontagioso i ku por ta fatal. Diferente medio a konfirmá ku e barku di 440 pia ta wantá den e haf di St. Lucia.

E ehekutivo médiko mas importante di e isla a bisa ku nan a haña informashon for di dos fuente di konfiansa ku a konstatá por lo ménos un kaso di sarampi na bordo di e barku. Segun e ehekutivo, dr. Fredericks-James, e persona afektá ta den kondishon stabil. El a konfirmá ku ta kordinando ku e organisashon pan-amérikano di salú PAHO i  Caribbean Public Health Agency riba e kaso aki. Pa awor aki e barku ta di skèdjel pa sali for di haf di Sint Lucia awe nochi. Pasaheronan no por baha for di e barku. E barku tin su stashon prinsipal na Kòrsou.

Riba e wèpsait di e barku por lesa ku ora un hende subi riba Freewinds, esei ta e máksimo di un hornada spiritual profundo. Ta despues di hopi aña di training un hende ta yega na e punto aki. Ta e logro mas importante den un hende su bida i ku ta realisashon kompleto di su inmortalidat.

Mientrastantu a informá ku den 22 estado na Merka a konstatá 704 kaso kaba e aña aki. E estadonan a tuma diferente medida. Algun di nan a pone esnan infektá den karentena i otronan a anunsiá but pa esnan ku no bakuná. E

Centers for Disease Control and Prevention  (CDC) a bisa ku ta trata di e kantidat mas grandi di kaso for di 1994 i for di despues ku a deklará sarampi eliminá na Merka na 2000. A raportá kasonan na Karizonan, California, Colorado, Connecticut, Florida, Georgia, Illinois, Indiana, Iowa, Kentucky, Maryland, Massachusetts, Michigan, Missouri, Nevada, New Hampshire, New Jersey, New York, Oregon, Texas, Tennessee i Washington. CDC a bisa ku e vírus ta biba den nanishi i garganta i ta plama ku nistermentu i tosamentu.