WILLEMSTAD.- Kontrario na loke ta e pensamentu riba kaya, dia 16 di yanüari benidero frontera entre Kòrsou, Aruba, St. Maarten i Venezuela no ta habri. Esaki promé minister di Aruba, Evelyn Wever-Croes, a enfatisá ayera. Ku esaki el a duna klaridat tokante e situashon nobo pa tur e tres paisnan.
Manera ta konosí kuminsando dia 15 di yanüari 2021 un rekisito di visa lo ta na vigor pa personanan ku nashonalidat venezolano. Esaki ke men ku personanan ku pasaporte venezolano mester apliká pa un visa pa por biaha pa e paisnan Karibense den Reino Hulandes.
Esaki no tin nada di aber ku habrimentu di frontera ku Venezuela, e minister-presidente di Aruba a splika. E desishon pa introdusí visa pa venezolanonan drenta un pais di Reino ta unu di Hulanda. E visa ta pa esnan ku ta biba na Venezuela i tin nashonalidat venezolano. 15 di yanüari ta e fecha pa esaki drenta na vigor, segun Hulanda a informá.
Pero si visa keda kla mes pa 15 di yanüari, frontera ku Venezuela no ta habri. Manera ta konosí frontera ta será pa otro motibunan i promé ku e situashon di COVID-19. Apertura di e frontera a base di esei ta un proseso ku ta andando. Manera ta konosí presidente di Venezuela Nicolás Maduro fin di òktober aña pasá a ekspresá su deseo pa restablesé relashonnan ku islanan Karibense di Reino Hulandes. Pero te ainda e frontera ku Venezuela ta será.