WILLEMSTAD.- Últimamente malechornan a kuminsá bèk ku un práktika pa kometé froude via internèt. Froude via internèt meskos ku “Skimming” no ta algu nobo. Ta froude nan ya konosí mundialmente. Pero últimamente esaki a lanta kabes drástikamente na Kòrsou. Víktimanan a pèrdè alrededor di 40 mil florin for di nan kuenta di banko.

Polis Kuerpo Polisial di Kòrsou a risibí keho di diferente siudadano ku a bira víktima di aktonan froudulento i di ladronisia for di nan kuentanan di banko. E forma di operá di e delinkuentenan ta, ku nan ta risibí un mail ku supuestamente ta di banko i ta pidi e kliente pa e subi un link.

Na momentu ku e hasi esaki, e sistema ta indiká ku e ta bezig ta ‘upgrade’ i ta pidi e kliente su nòmber di usuario i kódigo sekreto. Na momentu ku e kliente kaba di registrá tur e informashonnan aki, e sistema ta sera normalmente. Despues di un tempu, e kliente ku a hasi e trámite aki, ta bin ripará ku un montante a wòrdu kitá for di su kuenta, sin su outorisashon. No ta usual ku bankonan ta pidi klientenan informashon manera nòmber di usuario i kódigo sekreto via di mail. Tampoko nan ta duna nan klientenan informashon konfidensial ni sekreto via di e-mail.

Pues ta trata aki di un mail froudulento ku no ta salí di bankonan. P’esei Kuerpo Polisial ta pidi tur kliente di banko pa tene bon kuenta i sea alerta pa e práktika aki, ya ku tin klientenan ku a bira víktima di sumanan di alrededor di 40 mil florin ku a disparsé for di nan kuenta sin nan outorisashon.