WILLEMSTAD.- Fundashon pa Konsumidó ku regularidat ta hasi anotashon di preis di e diferente makutunan pre-selektá. Den e kaso aki a hasi anotashon di preis di fruta i bèrdura den fruterianan na Kòrsou. Ku e meta pa brinda  konsumidónan un bista amplio di preisnan riba merkado.

Den e periodo di 1 te ku 7 di aprel, FpK a bishitá 8 fruteria i anotá preis di un kantidat di 81 produkto. E 8 establesimentunan ku a bishitá ta: Aline Fruit Center, Bo Kunuku, Carrot Export, City Center/Plantage Mendez, Dani’s Fruit Center Weto i Dani’s Fruit Center Schonegevelstraat, Fruteria Los Primos i Fruteria Helen.

Ta bon pa enfatisá ku Fundashon pa Konsumidó durante e komparashon di preis no ta tene kuenta ku pais di orígen, marka ni kalidat di produkto.

City Center/Plantage Mendez e fruteria ku mas produkto na un mihó preis  

Resultadonan di e anotashon di preis ta indiká ku City Center/Plantage Mendez tin mas produkto na un preis mas ekonómiko. Di e 81 produktonan, City Center/Plantage Mendez tabatin 28 produkto na un preis mas kumbiniente. Bo Kunuku ta na di dos lugá ku un kantidat di 19 produkto i Dani’s Fruit Center Weto i Schonegevelstraat na di tres lugá ku 17 produkto.

Dani’s Fruit Center esun ku mas variedat di Fruta i Bèrdura

Despues di a analisá resultadonan di e anotashon di preis na e diferente Fruterianan ariba menshoná, Fundashon pa Konsumidó a konstatá ku Dani’s Fruit Center Schonegevelstraat ta e fruteria mihó surti basá riba e 81 produktonan ku a keda anotá den e periodo di  ariba menshoná. Di e 81 produktonan, Dani’s Fruit Center Schonegevelstraat ta tin un total di 61 produkto den stòk. Dani’s Fruit Center Weto ta resultá na di dos lugá ku un kantidat di 57 produkto i City Center/Plantage Mendez ta na di tres lugá ku 56 produkto den stòk.

Diferensia di preis 

Durante di e anotashon di preis aki a konstatá tambe algun diferensianan grandi di preis.  Por ehèmpel 1 kilo di broccoli na City Center/Plantage Mendez ta kosta cg.10,- i na Fruteria Los Primos esaki ta kosta cg.16,95, pues un diferensia di cg.6.95. Pa loke ta trata gèmber, 1 kilo na City Center/ Plantage Mendez i carrot Export ta kosta cg.12,- i na Dani’s Fruit Center Weto i Schonegevelstraat esaki ta kosta cg.22,- kual ta un diferensia di cg.10,-.

Fundashon pa Konsumidó ta pone énfasis riba e diferensianan aki pa asina duna konsumidónan un mihó bista riba e preisnan ku tin riba nos merkado, pa asina por kumpra mas konsiente.

Enfatisando esakinan, Fundashon pa Konsumidó ke para ketu riba e importansia di kome salú i alabes e relevansia di kompra konsiente i responsabel.

Pa mas informashon tokante e anotashon di preis di fruta i bèrdura por tuma kontakto ku nos na number di telefòn 462-6666 òf e-mail info@fundashonpakonsumido.cw. Pa e lista di preis kompletu por subi riba nos wèpsait www.fundashonpakonsumido.cw.