WILLEMSTAD.- Mañan djasabra ta fecha pa e festival ‘Tabula Rasa’ ku lo tuma lugá na Fuik Valley pegá ku Santa Barbara Beach & Golf Resort. E espektákulo lo tuma lugá riba un tereno mei mei den naturalesa ku bista riba Fuikbaai, e terenonan di Mijnmaatschappij i Tafelberg.
E organisadónan, Sterck Events huntu ku Massive Productions i e sosio ulandes ‘ALDA’ ta esnan responsabel pa e diseño i konstrukshon di e tereno kaminda e festival ta bai tuma lugá.
E atrakshon dje anochi lo ta e presentashon di e dj # 7 di Mundu, ‘Don Diablo’ kende lo kompartí tarima ku Salvatore Ganacci konosí pa su presentashonnan durante di Tomorrowland, e popular dj di músika urbano na Ulanda, Freddy Moreira, e house dj Baggi i e dj-nan lokal Maarten Schakel i Natsuj ta hasi e programa di Tabula Rasa kompletu.
Un ‘Foodie Area’ ku e konosido trùk ‘Kokí riba Blòki, Döner & More, The Pitsmokers i aserka Santa Barbara Beach Resort ta pèrkurá pa un kushina ‘Tex Mex’ huntu ku un bar eksklusivo ku ròm, biña i sigá tambe ta forma parti dje set-up dje festival.
Tin diferente manera pa bo yega Fuik Valley, bo por hasi uso di un sitio di parker preferensial ku ta keda banda dje sitio dje festival. Pa esaki tin karchi disponibel via Dolfijngo.com. Sobrá shofùrnan por parker na e entrada prinsipal di Santa Barbara i lo keda transportá ku bùs pa e sitio dje evento. E organisashon a pèrkurá tambe pa bùsnan grátis for di tres punto riba Kòrsou. Esakinan ta sali pa 7 or di anochi di Jan Thiel, Telamonstraat i na Movies situá na Waaigat. Ku e mesun bùsnan bo por bai kas 1 or i 2 or di mardugá. Registrashon pa transporte grátis tambe bo por hasi esaki via di Dolfijngo.com
‘Tabula Rasa’ ta tuma lugá mañan anochi kuminsando pa 7 or di anochi pa 2 or di mardugá na Fuik Valley na Santa Barbara Beach Resort. Karchinan ta optenibel na online ticketshop, Dolfijngo.com i e puntonan di benta konosí na Kòrsou: Van den Tweel Zeelandia, Mensing’s Caminada, 24 Uur uit de Muur, Bruna, Bottles, Madero Lifestyle Store i Fun Miles. Mesanan VIP ta optenibel na VIP@sterck.events.