Segun bosero di wardakosta nan ta aploudí e bon komportashon

WILLEMSTAD.- Ayera  tabatin e famoso Fuikdag.  Ta trata di un evento ku último tempunan akí ta birando grandi kaminda mas i mas ta esnan ku ta kue direkshon pa e laman di Fuik sea ku boto, seadoo òf yate. E aña akí un kantidat di boto for di Boneiru i Aruba tambe a bin Kòrsou pa asina presensiá e evento akí.

Wardakosta ta esun ku tabatin e enkargo riba laman pa vigilá i kontrolá si tur hende a tene nan mes na reglanan ku nan a stipulá simannan adelantá,  pa ku e evento. Segun bosero di Wardakosta, sra. Shalick Clement, nan ta sumamente kontentu kon tur hende a komportá nan mes e aña akí. No tabatin niun insidente ni nada for di regla.  E aña akí kompará ku aña pasá, tabatin mas o ménos 250 boto ku a bishitá “Fuikdag’ ku ta un poko mas tantu kompará ku aña pasá, segun sra. Clement. Pa loke ta trata e fenómeno di “kabe’i boto”, tambe sra. Clement a bisa ku e tim di Wardakosta tabatin bon kòntròl riba dje, debí ku esaki ta prohibí. Aki aya tabatin algun persona ku a purba pero e tim di Wardakosta tabatin tur kos bou di kòntròl.

Na final sra. Clement a bisa ku ta importante pa kada doño di boto ku ke sigui partisipá na e magno evento akí, keda pone atenshon na e mantenshon di nan boto pa asina otro aña ku Dios ke, esaki sigui den bon estado pa por yega Fuikdag trankil i sin niun problema. E tim di Wardakosta un bia mas ta aploudí e bon komportashon di tur persona ku a bishitá Fuikdag ku a bai sin niun problema.