Alarma a pone tur instansia di emergensia drenta akshon

WILLEMSTAD.- Akshon rápido di emergensia di CURINDE, aktivá debí na alarma di kandela, a demonstrá ku no tabata kandela sino aktividat pa fumigashon kontra di insekto.  Kuerpo di Seguridat di CURINDE tin protokòlnan bon kla stipulá den kaso ku tin alarma debí na huma.  P’esei e Kuerpo di Seguridat di CURINDE a aktivá mesora na momentu ku e alarma a drenta. Tur entidat ku mester a drenta den akshon a keda aktivá rápidamente. A resultá sinembargo ku ta trabounan di fumigashon pa prevení presensia di insekto tabata tuma lugá.

CURINDE ke pidi su diskulpa pa e inkumbiniensia i tambe ku e alarma i e akshonnan nesesario por a alarmá i hala atenshon, pero alabes e ta satisfecho ku e forma rápido i diligente ku tur envolví a aktua,  demonstrando ku e protokòlnan stipulá den un kaso di emergensia ta na lugá.