WILLEMSTAD –  E popular programa di lealtat Fun Miles a habri 2017 ku un bríndis festivo na Ginger den Pietermaai. Huntu ku partnernan, provedor i media a brinda pa un aña nobo den kua miembronan di Fun Miles por spera ainda mas fun i inovashon, manera un app i un wèpsait nobo. Gert-Jan van der Meulen (e direktor nobo for di yüli) a revelá algun di e plannan aki den un spich entusiasmá. Na final di su diskurso, el a yama señor Erwin Jansen pa bin dilanti, ganadó di e premio mayó den e gran kampaña di fin di aña ‘Activate the Fun & Win!’. Banda di hopi felisitashon, tambe el a risibí un voucher pa e kantidat enorme di 500.000 Fun Miles.

un monton di premio

Ku su premio mayó señor Jansen por hasi hopi kos dibertido na diferente Fun Partner, di e fakansi di su soñonan te ku un renobashon grandi. Pero e no tabata e úniko ganadó. Durante e kampaña sentenáres di hende tambe a gana un di e premionan semanal, i komo koronashon riba tur e alegria, tabatin algun premio grandi di diferente partner di Fun Miles. Ruthmila Kopra a bai ku e premio di Mau-Asam Travel: un biahe pa Sto. Domingo pa dos persona.

Kooyman a rifa dos premio grandi: un èrko ‘inverter’ di Fairwind a bai pa Lorienne Michel i Marie-Josephine Salvatore a gana un grel luhoso.

E premio di WIMCO, kual ta un bunita Sony Home Theatre System, a bai pa Joey Victor Wong A Ton.

UN AÑA MARAVIOSO PA FUN MILES

Den su spich, Gert-Jan van der Meulen a para ketu na e éksito di Fun Miles. Niun kaminda na mundu no tin un programa komparabel ku un porsentahe di uso asina haltu. Pero el a menshoná algun reto tambe, i el a laga sa ku pega soño no ta un opshon. P’esei na 2017 lo sigui modernisá Fun Miles, tantu dilanti komo patras di kòrtina. Banda di un app i un wèpsait nobo, i servisionan nobo di promoshon pa e partnernan, esaki tambe ke men: mas kampaña emoshonante ku chèns abundante di gana. 2017 ta primintí di ta mas Fun ku nunka.

MAS INFORMASHON TOKANTE FUN MILES?

Bishitá funmiles.net òf facebook.com/funmiles.