WILLEMSTAD.- Fundashon Alton Paas a lansa otro vehíkulo di transporte Wheelee i nan ta duna servisio di transporte pa personanan ku tin un limitashon di mobilidat. E fundashon su partnernan ta ofresé deskuento na momentu ku klientenan di Wheelee presentá na nan establesimentu. E fundashon a gradisí Rotary Club Willemstad ku tabata e donante mayó pa e fundashon i asina nan por a logra kumpra e vehíkulo di transporte. Mitar di aña 2024, Fundashon Alton Paas a keda skohé pa Rottery Willemstad pa duna un presentashon di nan aktividatnan. Aki e fundashon a mustra riba e nesesidat di un vehíkulo mas, Wheelee i pa yega na akapará e kantidat di persona ku mester di transporte. Rottary a organisá un aktividat i nan a logra haña 40 mil florin ku a bai p’e fundashon. Asina nan por haña a yega na un Wheelee nobo. Ministerio di SOAW a tuma e proyekto akí di Wheelee pa supsidiá kareda di personanan ku problema ku mobilidat. Pues pa un persona hasi uso di Wheelee durante dia e ta paga solamente 15 florin i sobrá ta keda supsidiá dor di SOAW. Esaki ta masha importante paso un hende ku tin limitashon, ku ta den rolstul òf no por kana bon, tambe tin e posibilidat di sali su kas pa dibertí i partisipá den komunidat. Nan proyektonan ta na bienestar di un grupo vulnerabel i ku nan ke trese den komunidat.
Representante di Hulanda konhuntamente ku Reda Sosial tabata masha importante pa e fundashon. Paso nan ta bai start ku un proyekto “Akseso pa Tur, Inklushon i mobilidat na Kòrsou”. Esaki ta pa por laga komunidat rekonosé i aseptá ku personanan ku tin un situashon di limitashon di mobilidat, tambe ta parti di komunidat.
Alton Paas a splika di unda e idea a lanta pa por tin un transporte pa hende desabilidat. E ta forma parti di un grupo di hende ku dwarslesie ku tabata bini huntu pa haña informashon di e malesa akí i sostené otro. Sinembargo tin biaha transporte ta difísil pa haña òf pasó ta anochi, e transporte ta bira mas kostoso. Transporte ta keda un reto pa e persona den ròlstul. P’esei e fundashon a wak kon por duna aporte na esaki i ku yudansa di SOAW a logra di yega na 2 outo na aña 2015. Pues e aña akí, 2025, nan ta kumpli 10 aña ku a kuminsá ku Wheelee. Den 10 aña, e fundashon a logra di kumpli ku mas di 17 mil kareda. E 17 mil kareda ta di 320 kliente. Den aña 2024 tin 120 kliente ku a aserka Wheelee pa kareda. Sr. Paas a sigui bisa ku el a kuminsá ku un trayekto Wheelee 2.0. ku e meta ku nan ke logra den e siguiente tres añanan pa kumpli ku 2000 kareda pa luna, ku ta nifiká mas outo, mas pèrsonal pa kumpli ku e nesesidat, pasó komo fundashon tin e motivashon di un futuro sin limitashon. E kantidat di kareda ta abase di datos ku tin, di kantidat di hende desabilitá den komunidat. Tambe e fundashon a lansa e logo nobo di Wheelee, ku ta simbolisá e hende por sali dibertí i no solamente bai dòkter. P’esei e logo nobo e ta nifiká kompaño, alegria, inklushon i mobilidat. E ta pa e hende sinti ku e por dibertí di bida.