WILLEMSTAD.- Prof. dr. Bob Pinedo ta sumamente kontentu ku e trabou di Fundashon Prevenshon ta hasi. Djabièrnè último durante un konferensia di prensa Pinedo a splika ku kasi un aña i mei pasá e fundashon a kuminsá ku un proyekto grandi pa kontrolá un parti di poblashon di Kòrsou riba kanser di tripa. Na promé instansia tur abitantenan entre 50 i 75 aña lo wòrdu invitá pa hasi un kontròl riba e tipo di kanser ei. Pinedo a splika ku promé ku esaki Fundashon Prevenshon a kontrolá riba kanser di pechu i di boka di matris. ‘Niun hende tin ku wòri, nos ta sigui ku esaki tambe.’
Segun Pinedo e proyekto nobo tin komo meta pa kontrolá si hende ta den e promé fase di posibel kanser den tripa.’ E no ta pa hendenan ku tin doló òf problema, pero pa hendenan ku no ta sinti nada ainda, Pinedo a splika. ‘Via di e kontròl nos por detektá si nan tin ‘poliep’ den nan tripa, òf ku tin chèns ku kanser lo krese.’ Tur hende ku keda invitá tin ku bin ku un muestra di nan shushi. Si dòkternan ta detektá sanger den e sushi nan lo wòrdu invitá pa un kolonoskopia (listramentu di tripa) den e sentro nobo di e Fundashon prevenshon, ku ta situá na Molenplein na Otrobanda. Pinedo ta presidente i ko-fundador di Fundashon Prevenshon. E ta traha huntu ku espesialista Michiel van Haastert for di Hulanda.
Durante konferensia di prensa tambe tabata presente dòkter Shacara Blake, sientífiko médiko lokalmente enkargá ku e proyekto aki. Señor Frenzel Martis tambe a hiba palabra. E ta di 100 partisipante na e investigashon den pueblo, kaminda nan a registrá algu den su sushi loke a hustifiká pa hasi un kolonoskopia. El a konta ku e ta kontentu di a hasi e tèst pa evitá problema despues. El a rekomendá ‘tantu hende hòmber komo hende muhé pa partisipá na e investigashon den poblashon na momento bo ta risibí e karta di invitashon di e fundashon’.
Dòkter Shacara Blake a splika ku tin ainda no ta kla si un tipo di kuminda por kousa kanser di tripa. ‘Klaramente humamentu i alkohòl no ta bon pa un kurpa. Pero nos no ta konsehá hende pa stòp di kome karni por ehèmpel.’ Dr. Blake ta kontentu ku e reakshon di pueblo di Kòrsou. Fundashon Prevenshon a manda mas ku 15.000 karta, diferente míles di hende a partisipá kaba. Fundashon Prevenshon ta usa e sistema di partimentu di Kòrsou den distritonan, ku tambe ta wòrdu usá pa elekshon. Blake: ‘Ora nos manda karta den un distrito, nos tambe ta bishitá e bario ku un bus di Fundashon Prevenshon pa informá hende i motivá nan pa partisipá.’
Na su opinion kantidat di hende ku a partisipá ainda ta basta bon. Segun Pinedo situashon di COVID-19 tin komo konsekuensia ku hende ta un tiki mas kouteloso, pero Pinedo tambe ta kontentu i a deklará ku Fundashon prevenshon lo sigui ku e proyekto pa asina salbaguardiá bida di hende di Kòrsou.