WILLEMSTAD.-  Funditut i EduDesign Caribbean BV a firma un kombenio pa por kualifiká tur partisipante di e proyekto Un komienso nobo, pa medio di EVC ‘assessment’.

Un komienso nobo ta un proyekto finansiá ku fondonan for di e asina yamá fondo di kriminalidat pa duna na un mínimo di 120 hóben den un posishon sin speransa e oportunidat di por integrá den sosiedat i na merkado laboral.

EVC ta para pa Erkennen van Eerder Verworven Competenties na Papiamentu Rekonosementu di Kompetensianan Previamente Atkerí (RKA). E partisipantenan di e proyekto lo atkerí eksperensia durante un trayekto di stazje i e eksperensia aki ta e punto di salida pa asina por kualifiká nan.

Na lugá di drùip òf slag pa medio di EVC por determiná kiko e persona por i kiko e lo mester siña adishonal na boka di trabou pa asina e por haña su kualifikashon.

EVC ta un instrumento pa kualifiká personanan sin diploma pero ku añanan di eksperensia laboral basa riba nan eksperensia.

EduDesign Caribbean ta ofresé EVC rekonosé pa Kenniscentrum EVC.