WILLEMSTAD - Djárason 4 di mei 2022 alrededor di 20.35’or, Sentral di Polis a risibí informashon ku riba e kaminda sin nòmber entre Stadion Ergilio Hato i e edifisio di F.F.K., un tiramentu a tuma lugá i ku tabatin un hòmber gravemente heridá riba e tereno di e sentro deportivo.

Na yegada di e promé unidat, el a topa un kantidat di mas o ménos 30 kashi di bala riba kaya i un hòmber riba e tereno ku heridanan di bala na entre otro altura di su pechu i parti abou di su barika.

Mesora a pidi presensia di ambulans na e sitio pa transport’é ku urgensia pa Sala di Emergensia di C.M.C., ya ku su situashon na e momentu ei tabata mustra di tabata bastante krítiko.

E hòmber aki a risibí alrededor di 10 impakto di bala. Tambe 5 vehíkulo a risibí perforashon di bala.

For di investigashon preliminar ku polis a realisá na e sitio a sali na kla ku un vehíkulo modèl di un SUV koló blou ku glasnan skur lo a kore yega na e sitio i okupante(nan) di e outo aki a kuminsá basha bala riba e víktima ku a trata na kore i bin kai riba tereno di e sentro deportivo.

Mas o ménos 23.00’or, informashon a drenta na Sentral di Polis, ku e víktima di e tiramentu aki, e hòmber Sedwin G. Reigina nase na Kòrsou dia 3 di sèptèmber 1996 a fayesé a konsekuensia di e heridanan ku el a sufri.

Polis ta hasi un apelashon na tur siudadano ku tin mas informashon tokante di e kaso aki i ku a testiguá e insidente, pa tuma kontakto ku polis na 917 òf e number anónimo 108.