Gobernador: Semper lo mi tei pa apoyá, duna konseho i kaminda mester duna atvertensia tambe

WILLEMSTAD.- Ministernan di gabinete Pisas II a kaba di huramentá serka su ekselensia gobernador sra. Lucille George-Wout. Aparte di e ministernan e minister plenipotensiario tambe a huramentá. Na e okashon aki gobernador a korda tur ku a kaba di huramentá ku for di e momentu ei nan ta minister pa tur yu di Kòrsou.

‘For di awor boso tin un enkargo pisá ta warda boso pasobra boso ta bai kuminsá ku tareanan di gobernashon di un pais bou di sirkunstansianan eksepshonalmente difísil. Afortunadamente na Kòrsou e krísis di Corona ta parse di ta un tiki kontrolá, pero esei no ta nifiká ku nos por sigui biba nos bida manera kustumber. Laga nos ta sinsero pa hopi hende den e komunidat aki asta promé ku Corona nan bida no tabata fásil. Stankamentu ekonómiko sigur tin su impakto riba hinter e poblashon. Mester hasi tremendo esfuerso pa laga nos ekonomia krese i asina ofresé e poblashon aki perspektivanan nobo.”

Gobernador a indiká mas aleu ku mester di konsulta konstruktivo tantu entre polítikonan lokal i partnernan sosial lokal komo konsulta konstruktivo ku partnernan den reino. E konfiansa ei mester krese entre partnernan i e konfiansa ei ta e ministernan nobo aki mester gan’e a base di esfuerso i a base di nan prestashon.

Gobernador a bisa ku semper e lo tei a duna apoyo na e tim di ministernan nobo, pero tambe pa duna konseho i kaminda tin mester e lo duna atvertensia tambe. ‘Siudadanonan ta konta ku kada un di boso”, di e forma e gobernador a finalisá su parti. Mas detaye den edishon di EXTRA.