WILLEMSTAD.-Ministernan di gabinete Pisas III a anunsiá algun desishon pa mitiga e impakto di oumentu di kosto di bida riba komunidat. Minister di SOAW sra. America a informá di bónus èkstra pa algun grupo vulnerabel manera kobradónan di ònderstant, wèrfano i otronan i tambe sierto kompensashon pa esnan ku ta kobra penshun di behes AOV. Esaki a sosodé durante un relato di dia ku a tuma lugá riba e djaweps aki.

Den mesun rosea minister di Finansa sr. Cooper a informá ku gobièrnu ta bai parti un total di 8 mion florin na bono e fin di aña aki ku ta nifiká 1000 florin neto na empleadonan di kompanianan di gobièrnu i esnan ku ta haña supsidio di gobièrnu. A hasi un apelashon na sektor priva pa sigui e ehèmpel di gobièrnu. Tambe minister Cooper a anunsiá ku hendenan ku ta kore un vehíkulo diesel priva, entrante yanüari 2027 ta bai paga mesun kos ku esnan ku vehíkulo di gasolin. Pa hopi aña a diskutí e echo ku un hende priva, kisas un famia tin un outo di famia ku motor diesel i mester paga e suma di 1149 florin pa aña pa su number di outo paso e ta diesel. Entrante yanüari 2027 esei ta kambia, pa e outo di famia ei ta bai paga solamente 394 florin pa aña meskos ku outo di gasolin. E ta konta solamente pa vehíkulo priva, pues no ta konta pa trùknan grandi, katapila etc.

Tambe minister Cooper a informá ku ta introdusí bèk pa hende ku ta doño di kas por dedusí 5000 florin for di su belasting pa gastu di mantenshon. Algun aña pasá a kita esei, i awor gabinete Pisas III ta bini kuné bèk. Mas detaye den edishon di EXTRA.