Corinne Djaoen-Genaro ta bira vise-presidente di Staten

WILLEMSTAD.- Gabinete Pisas ta hura ku tur probabilidat djaluna 14 yüni awor. Asina fuentenan yegá na e proseso di formashon ta konfirmá pa EXTRA, ounke ku ta tene kuenta ainda ku e posibilidat ku huramentu por tuma lugá un tiki mas trempan, esta djabièrnè 11 yüni .

Den e gabinete nobo ku lo sinta 2 minister lo ta enkargá ku 2 kartera. Promé minister Gilmar “Pik” Pisas (MFK) lo ta enkargá ku e karteranan di Asuntunan General i Hustisia. Ruthmilda Larmonie-Cecilia (PNP) lo ta enkargá ku e kartera di Asuntunan Sosial, Labor i Bienestar i alabes ku e kartera di Desaroyo Ekonómiko.

Esaki tin di aber ku e echo ku tin 2 kandidato pa minister ku formadó al final no a proponé na Gobernadó pa nan presta huramentu. Eseinan ta presidente di partido Nashonal, Ramon Chong i parlamentario pa partido MFK, Eduard Braam.

Entretantu tin bastante spekulashon ken ta e kandidatonan nobo ku MFK i PNP lo skùif dilanti pa bira minister. Informashonnan ku EXTRA ta disponé di dje ta indiká ku punto di salida di partido PNP ta ku ta skohe un kandidato for di riba lista di kandidatonan ku a partisipá na elekshon 19 mart último.

Den kaso ku PNP no keda kla ku un kandidato apropiá for di e lista di kandidato lo mester buska den seno di demas miembro i simpatisadó di e partido òf un profeshonal eksterno ku e partido tin konfiansa den dje. Nòmbernan manera Dudley Lucia i Dennis Evertsz a kai kada den e kaso aki.

MFK di su banda lo tuma su tempu pa yega na un otro kandidato pa e funshon di minister di Hustisia. Aki tambe algun nòmber a kai kaba manera esunnan di Rigo Thodé ku ta number 16 riba lista di kandidato ku a partisipá na elekshon di 19 mart último, eks hefe di Kuerpo Polisial Marlon Wernet i formadó, Chester Peterson.

Despues ku e ministernan nobo hura lo bini kambio den konstelashon di e frakshonnan di MFK i PNP den parlamento. Dave Seferina, Amerigo Thodé i Ramon Yung lo drenta parlamento pa remplasá Pisas, Charles Cooper ku ta bira minister di Tráfiko, Transporte i Planifikashon Urbano i Javier Sylvania ku ta bira minister di Finansa. Pa Nashonal Elvin Gerard i Corinne Djaoen-Genaro lo drenta na lugá di Larmonie-Cecilia i Ornelio ‘Kid’ Martina.

Djaoen-Genaro lo remplasá Larmonie-Cecilia komo vise-presidente di parlamento miéntras ku Martina lo ta enkargá ku e kartera di Maneho di Gobernashon, Planifikashon i Servisio Públiko. Otro kandidato ku lo hura pa bira minister ta Sithree van Heydoorn ku ta number 28 riba lista di MFK. E lo ta responsabel pa e kartera di Enseñansa, Siensia, Kultura i Deporte. Dorothy Janga , number 23 riba lista di MFK lo asumí responsabilidat pa e kartera di Salubridat, Medio Ambiente i Naturalesa.