AMSTERDAM.-Gobièrnu ulandes a kai awe mainta despues ku un rapòrt ku ta trata e kompensashon pa yu a revelá detayenan devastador. Gabinete Rutte III ta baha den su totalidat despues di esaki, asina agensianan di notisia ulandes ta informa. Pa algun tempu kaba tin hopi malkontentu pa e asuntu di ‘kinderopvangtoeslag’ ku a hinka hopi famia den problema grandi. Algun mil famia a konfrontá problema ora ku segun e ministerionan konserní, e famianan aki lo a kobra sèn di mas anto a a bai pone preshon pa kobra e plaka aki bek.

A dura bastante pa finalmente yega asina leu ku a start un investigashon profundo den e kaso aki. Finalmente e investigashon a terminá i e konklushon a pone ku di tur área a bini un preshon enorme riba gabinete di premier Mark Rutte.

Den oranan di mèrdia, na Ulanda, a anunsiá ku e gabinete di Rutte ta bira demishonario despues ku altesa rei Willem Alexander aseptá e retiro di e gabinete. Un gabinete demishonario ta nifiká ku lo sigui atendé solamente asuntunan koriente. Nada nobo lo no bai haña atenshon.