WILLEMSTAD.- ‘Gang” nan a djòin e manifestashon ayera i a kousa disturbio i destrukshon, ta loke ku minister di hustisia sr. Quincy Girigorie a duna di konosé. Ta un grupo di 150 pa 200 hende i di kual tin miembronan di “Gang” nan na Kòrsou ku tambe a djòin.
Mirando situashon, minister di hustisia sr. Girigorie a disidí pa sera sentro di siudat, esta Punda i Otrobanda. Pa Punda ta konta for di edifisio di Citcobank i na Otrobanda for di Banco di Caribe. Ta sera e área aki te ku djabièrnè 6’or di mainta.
Sinembargo mas despues a kanta un Toque de Queda ku a kuminsá for di ayera 8:30 di anochi pa awe mainta 6’or di mainta. Pasombra a kuminsá sakea negoshinan na otro sitio, spesialmente negoshinan di lugánan elektróniko. Skolnan den área di Otrobanda ta será pa awe.
Mas aleu minister a bisa ku Kuerpo Polisial a haña ayudo di VKC i tambe Milisia Antiano pa por hasi kontrol i no a buska militar ulandes manera rumornan ta kore den komunidat.
Pa loke ta trata esnan ku a kometé destrukshon, minister Girigorie a indiká ku tabatin kámara ku a graba tur loke a sosodé i lo bai na detenshon di hende. Ya a kuminsá detené hende pa nan para responsabel pa nan aktonan.
Finalmente minister Girigorie a bisa ku nos mester tin Amor pa nos pais i esaki mester ta riba interes personal pa nos por bria.