Kontakto ku hóbennan; e eksperensia di mas pisá pa Garcia

WILLEMSTAD.- Un di e aspektonan ku a bin dilanti den korte siman pasá durante tratamentu di e kaso penal kontra di eks bankero Eric Garcia, ta e kapasidat di detenshon. Manera ta konosí, Garcia ta den detenshon domisilio, pa motibu di su salú. Garcia tin problema ku kurason i esaki no ta fásil pa keda atendé den prizòn. Apesar di su edat i kondishon di salú, fiskal ta di opinion ku Garcia mester bai prizòn bèk, pa motibu ku aki na Kòrsou no tin hustisia di klase. Pero e pregunta klave ta, kondishon di salú di Garcia por soportá detenshon den SDKK, esaki ta e loke ku defensa di Garcia a motivá siman pasá den korte.

E tim di defensa formá pa Martina i Snel a trese dilanti ku polítikamente tin masha tiki atenshon pa hendenan di edat será den prizòn. Esaki por ta komprendibel pa motibu ku no tin dje tantu hende di edat será.

Esaki ta pone ku e hende di edat den detenshon ta keda atras kompará ku e atenshon ku tin pa hende muhé i hóbennan.

E detenido di edat ta pasa hopi problema den prizòn, pa motibu ku nan tin di dil ku e mesun roster i mesun aktividatnan loke ku ta pone ku hopi biaha nan ta keda den nan sèl.

Pero un di aspektonan di mas problemátiko pa un hende di edat den detenshon, ta e hóbennan, loke ku e grandinan ta eksperensiá komo un aspekto hopi pisá.

E kuido médiko tambe no ta optimal, ounke ku Ministerio Públiko ta sali for di e punto di bista ku e kuido ta riba nivel, tin semper un personal di medisina 24 ora den prizòn i ku lo aktua mesora.

Defensa no ta konvensí di esaki i a splika ku su kliente tin un otro eksperensia.

P’esei defensa ta pleita pa no manda Garcia prizòn bèk i si te na ora yega na un kondena, pa esaki ta un kastigu kombiná i konsiderá e aresto preventivo komo inkondishonal o sea duna Garcia un kastigu di trabou.