Gasolin, diesel, koriente i awa ta subi (vershon kompleto)

WILLEMSTAD.- Entrante djamars 26 di sèptèmber 2023 e tarifa di gasolin i diesel ta subi na Kòrsou.  E oumentonan aki ta respektivamente 6 sèn pa Gasolin  17 sèn pa Diesel. Tambe e tarifa di koriente i awa ta subi entrante djadumingu 1e di òktober 2023. Esakinan ku respektivamente 6 sèn pa koriente i 40 sèn p awa.

E kálkulo di tarifa pa Mogas 95, Gasoil LSD, LPG 20 i LPG 100 konosé e komponentenan

1. Preis di kompra, 2. Impuesto di importashon LSD, 3. Garantia di suministro di kombustibel (1a), 4. Garantia di suministro di kombustibel (1b), 5. Márgen pa Curoil, 6. Impuesto di konsumo (Akseins), 7. Sùrplùs/Défisit (Recovery), 8. Supsidio krusá, 9. O.B. di 6% pa benta por mayor, 10. Márgen pa agente, i 11. O.B. di 6% pa benta por detal. Pa sierto komponente e tarifa sero ta konta, sea temporalmente òf nò. E tarifa pa benta por mayor ta inkluí e promé nuebe komponentenan miéntras ku e tarifa pa benta por detal (na usuario final) ta inkluí tur komponente.

Ta determiná e preis di kompra, kaminda kalkulashon ta kuminsá, mensualmente pa e luna siguiente a base di e reserva di kombustibel disponibel na final di luna pasá. Pues: e preisnan di kompra ku ta stipulá pa òktober 2023, en prinsipio ta basá riba e reserva di kombustibel disponibel pa final di ougùstùs 2023.

Preisnan internashonal pa zeta i kombustibel ta subiendo kontinuamente desde yüni 2023. Maske ku e preis di kompra pa Mogas 95 a baha, e tarifa usuario final pa Mogas 95 ta subi debí na e subida fuerte den e komponente di korekshon. E tarifa usuario final pa Gasoil LSD lo subi prinsipalmente debí na e subida fuerte den e preis di kompra kual ta kore paralèl ku esun di Platts. Pa prevení un fluktuashon grandi den un solo biaha den e tarifa usuario di Gasoil LSD, e subida di e preis di kompra lo wòrdu repartí den dos pida medio di un komponente di korekshon negativo. E komponentenan di “Garantia di suministro di kombustibel” ta wòrdu levemente ahustá despues ku e prefinansiamentu dor di RdK i Curoil relatá na e gastunan pa uso di e infrastruktura riba e tereno di refineria yega na su fin.

Kálkulo tarifa awa i koriente

E kálkulo di e tarifa pa awa i koriente tin dos komponente: e tarifa básiko i e klóusula di kombustibel. E klóusula di kombustibel pa elektrisidat ta konsistí di dos elemento: kompra di koriente i gastunan di kombustibel.

E ‘kompra di koriente’ ta basá riba e preis pa e energia ku terseronan ta suministrá, manera energia di bientu i di solo. ‘Gastunan di kombustibel’ ta enserá produkshon di energia dor di Aqualectra mes.

Tambe e klóusula di kombustibel pa awa ta konsistí di dos elemento, ku ta “kompra” basá riba

preis di awa ku ta wòrdu suministrá dor di un terser partido i e gastunan di elektrisidat pa produkshon di awa dor di Aqualectra mes.

Sinembargo, kada luna e uso di e diferente medio pa produkshon – e asina yamá ‘meskla di produkshon’ ta varia. P’esei BT&P ta determiná e balor di e klóusula di kombustibel mensualmente basá riba e pronóstiko di Aqualectra, di kiko e meskla di produkshon lo bira, den e kaso aki pa e luna di òktober 2023. Si un luna despues resultá ku e elemento akí tabata muchu haltu òf muchu abou, ta korigí esaki. Den e kaso akí, ta trata di e luna di ougùstùs 2023.