WILLEMSTAD.- Entrante djamars dia 3 di mart di 2020 e tarifa regulá di gasolin, diesel i LPG lo subi na Kòrsou. For di djadumingu 1e di mart 2020 e tarifa di elektrisidat i awa ta baha. Esaki Bureau Telecommunicatie en Post (BT&P) ta partisipá dunando mas aleu un splikashon di e motibu.

E kálkulo di tarifa pa Mogas 95, Gasoil LSD, Gas bòm chikí di 20 i 100 konosé e komponentenan; 1. Preis di kompra, 2. Impuesto di importashon gas, 3. Garantia di suministro di kombustibel 4. Márgen pa Curoil, 5. Impuesto di konsumo (Akseins), 6. Sùrplùs/Défisit (Recovery), 7. Supsidio krusá, 8. O.B. di 6% pa benta por mayor, 9. Márgen pa agente i 10. O.B. di 6% pa benta por detal. Pa sierto komponente e tarifa sero ta konta, sea temporalmente òf nò. E tarifa pa benta por mayor ta inkluí e promé shete komponentenan miéntras ku e tarifa pa benta por detal (na usuario final) ta inkluí tur nuebe komponente.

Ta determiná e preis di kompra, kaminda kalkulashon ta kuminsá, mensualmente pa e luna siguiente a base di Curoil su fakturanan di kompra di e luna anterior. Pues: e preisnan di kompra ku ta stipulá pa mart 2020, ta basá riba Curoil su fakturanan di kompra di yanüari 2020. Den kaso ku kompra no a tuma lugá den un sierto luna pa motibu di un reserva adekuá, ta sali for di e fakturanan di kompra di mas resien. E preisnan di kompra akí ta wòrdu revisá dor di notashon di preis internashonal. Ta tene kuenta tambe ku otro eventual gastunan, relashoná ku e kompra, por ehèmpel gastunan di inspekshon. Dor di e lapso di dos (2) luna den e mekanismo pa determiná preis, por ta nesesario pa deskontá eventual diferensia entre e preis di kompra regulá i e montantenan di kompra real, di forma retroaktivo via e elemento ‘Sùrplùs/Défisit’.

E tarifa usuario final pa Mogas 95 ta subi ku sinku sèn i algu, esaki prinsipalmente komo konsekuensia di un subida di tantu di preis di kompra komo korekshon den e komponente sùrplùs/défisit. E tarifa usuario final pa Gasoil LSD ta subi ku 4 sèn prinsipalmente pa motibu di e subida di e korekshon den e komponente sùrplùs/défisit.

Seguidamente tin un komponente di tarifa adishonal añadí pa kubri e gastunan di kombustibel pa e operashon di un parti di e infrastruktura den refineria pa por garantisá suministro di kombustibel na Kòrsou. E subida di tarifanan usuario final pa gas grandi i chikí ta okashoná dor di e añadishon di e komponente adishonal "Garantia suministro di kombustibel". Gas grandi ta subi ku 2,50 florin i chikí ta subi ku 50 sèn.

E kálkulo di e tarifa pa awa i elektrisidat tin dos komponente: e tarifa básiko i e klóusula di kombustibel.

E klóusula di kombustibel ta konsistí di dos elemento: kompra di koriente i gastunan di kombustibel. E ‘kompra di koriente’ ta basá riba e preis pa e energia ku terseronan ta suministrá, manera energia di bientu, di solo i di CRU. ‘Gastunan di kombustibel’ ta enserá produkshon di energia dor di Aqualectra mes. Sinembargo, kada luna e uso di e diferente medio pa produkshon – e asina yamá ‘meskla di produkshon’ ta varia. P’esei BT&P ta determiná e balor di e klóusula di kombustibel mensualmente basá riba e pronóstiko di Aqualectra, di kiko e meskla di produkshon lo bira, den e kaso aki pa e luna di mart 2020.  Den e kaso aki pa loke ta tarifa di elektrisidat esaki ta baha ku 0,0041 sèn i pa awa esaki ta baha ku 29 sèn.