WILLEMSTAD.- Gobièrnu ta informá di preisnan nobo pa gasolin, gasoil, awa i koriente. Entrante 2 di yanüari 2018 te próksimo aviso e struktura di preis nobo pa gasolin i gasoil ta kambia. Gasolin lo subi ku kasi 2 sèn miéntras ku gasoil lo subi ku kasi 5 sèn. E subida di e tarifa usuario final di Mogas 95 ta prinsipalmente resultado di un subida den e preis di kompra i un bahada den e komponente Sùrplùs/Défisit. E subida di e tarifa usuario final pa Gasoil LSD ta resultado di un subida den e preis di kompra i tambe den e korekshon di e komponente Sùrplùs/Défisit.

E tarifanan di elektrisidat i awa entrante 1 di yanüari 2018 lo keda kambiá. Ta trata di un subida di tarifa pa elektrisidat i awa. E subida den tarifanan di elektrisidat ta wòrdu okashoná prinsipalmente pa motibu di e subida den preis di kombustibel. E subida di elektrisidat (ku ta nesesario pa produsí awa) a okashoná ku e tarifa di awa a subi, pero esaki a wòrdu kompensá ku e korekshon pa e luna di novèmber 2017. Den edishon di Extra mayan lo tin mas detaye.