WILLEMSTAD - Entrante 2 di aprel 2019 te próksimo aviso e struktura di preis nobo pa e produktonan Mogas 95, Gasoil LSD, ta lo siguiente: Gasolin lo subi ku kasi 5 sèn miéntras ku gasoil lo baha ku kasi 1 sèn.

E subida di e tarifa usuario final pa Mogas 95 ta prinsipalmente resultado di un subida di e preis di kompra i un bahada di e korekshon di e komponente surplus/défisit. E bahada di e tarifa usuario final pa Gasoil LSD ta resultado di un bahada di e komponente surplus/défisit.

Pa loke ta awa i koriente ámbos lo subi. Ta trata di un subida di e tarifanan pa awa i elektrisidat ku ta kousá prinsipalmente pa motibu di e preisnan di krudo ku ta subiendo i ménos negativo e faktornan di korekshon di awa i elektrisidat ofer di luna di febrüari komo konsekuensia di desviashonnan limitá den produkto miksto realisá kompará ku e pronóstiko. Den edishon di EXTRA mayan lo tin mas detaye.