WILLEMSTAD - Gobièrnu a kaba di informá di kambionan den preis di gasolin, disel, koriente i awa. Entrante 4 di sèptèmber 2018 te próksimo aviso e struktura di preis nobo pa e produkto Mogas 95 lo subi algu mas ku 2 sen miéntras Gasoil LSD lo baha algu mas ku 1 sèn. E kambio di e tarifa di usuario final pa “Mogas 95 i Gasoil LSD” ta resultado di un redukshon den e ekseso / défisit na komponente i tambe un oumento di e Márgen Curoil, i den e kaso di gasoil LSD tambe tin un redukshon den e preis di kompra. E subida di e Márgen Curoil ta a konsekuensia di e medidanan na benefisio di garantia di suministro di kombustibel na Kòrsou.

Na mes momentu a partisipá tambe ku e tarifanan di elektrisidat i awa entrante 1 di sèptèmber 2018 lo keda kambiá. Ta trata di un subida di e tarifanan pa elektrisidat ku ta kousá prinsipalmente pa motibu di e oumentu den preisnan di kombustibel komo konsekuensia di e kambio pa mihó kalidat (mas karu) di kombustibel ku mira riba mehorashon di disponibilidat di e unidat di produkshon i un oumentu den e faktor di korekshon ofer di e luna di yüli komo konsekuensia di desviashonnan den e produkshon miksto kompará ku e pronóstikonan. E subida di e tarifanan di awa ta prinsipalmente konsekuensia di e subida di e tarifanan di elektrisidat. Den edishon di EXTRA mayan lo tin mas detaye.