WILLEMSTAD.-Na komienso di ougustus, pa ser eksakto 3 di ougustus por spera kambio den preis di kombustibel na Kòrsou. Bureau Telecommunicatie & Post komo reguladó ta informa di e kambionan ku ta drenta na vigor entrante djamars awor 3 di ougustus 2021.

Gasolin Mogas ku su preis na pòmp ta aktualmente Fl 2.22 pa liter ta bira entrante djamars awor Fl 2.28 pa liter. Pa loke ta trata diesel LSD ta konosé un kambio, den sentido di un redukshon, ounke hopi chikitu. Diesel awor aki na pòmp ta kosta Fl 1.71 pa liter i e ta bira Fl 1.70 pa liter.

Gas pa kushina tantu esun di 20 lbs komo esun bòter grandi di 100 lbs ta keda mesun preis, respektivamente Fl 14 i Fl 70.

Den e splikashon BTP ta indiká ku e kambionan ta den liña ku e preisnan di kompra internashonal pa tantu Mogas 95 komo Gasoil LSD. Ta bin aserka un bahada ku a sobra di e komponente do garantia d suministro di kombustibel ku ta keda apliká ku bista riba implementashon di kònteinernan di ISO pa distribushon di LPG ku ta resultá den un solushon ménos kostoso pa garantisa suministro di kombustibel. Mas detaye den edishon di EXTRA.