WILLEMSTAD.- Abogado mr. Achim Henriquez no por keda warda mas riba minister drs. Ing. Armin Konket, pa loke ta trata e petishon pa revoká e desishon nobo di e minister, ku ta prohibí entrada na Sekretario General (SG) suplente Artoir Herrera na su lugá di trabou. Awe mainta e abogado ta entregá e petishon na korte. Tin un veredikto riba mesa ku ta indiká ku no tin niun motibu pa e minister keda stroba e SG suplente di hasi su trabou, sinembargo djaluna último 9 di aprel e minister a bolbe saka otro prohibishon kontra Herrera. Mientrastantu kada kaso den korte ta kosta gobièrnu alrededor di 15 mil florin i tin un investigashon di SOAB ku tambe a kosta riba 50 mil florin. E abogado ta kere ku ta hasi gastunan kuantioso pa tene e SG suplente afó.

For di e momentu ku e veredikto a bira konosí siman pasá tabata bisto, i esei e mandatario a deklará abiertamente ku e no a apresiá ku e SG suplente i su abogado a bai prensa ku e kaso. E abogado ta mustra ku minister Konket ta esun ku ta den prensa ku e kaso aki for di yüli 2017. Investigando e kaso mas aleu EXTRA a haña konfirmashon ku no ta bèrdat ku e SG suplente no ta koperá ku e investigashon. Herrera a duna tur koperashon pasobra e relashon entre e ámtenar i su minister no tin niun konflikto. Asta ta asina ku el a koperá kompletu te ku SOAB por a traha i presentá nan rapòrt.

Un bia mas ta bai korte ku e kaso aki. Riba e pregunta di EXTRA na e abogado, el a duna di konosé ku kada kaso ta kosta entre 10 pa 15 mil florin. Si konta ku ya kaba a bai korte i awor ta bai un bia mas, esei ta nifiká mas gastu. Ta bin aserka ku e investigashon di SOAB den e kaso aki tin un kosto di riba 50 mil florin ku ta pa kuenta di gobièrnu. E gastunan ta basta kuantioso den kada kaso di gobièrnu kontra un ámtenar i e kaso aki di gobièrnu kontra di e SG suplente di ministerio di Maneho di Gobernashon, Planifikashon i Servisio Públiko (BPD) no ta diferente.