...George Hernandez presidente nobo di ABVO...

WILLEMSTAD.- George Hernandez a keda elegí komo presidente di ABVO djabièrnè último. Hernandez a keda elegí ku 473 voto, i e dos otro kandidatonan sra. Jinessa Hato-Martina a haña 429 i sr. Albert Martina a risibí 462 voto. Pues un elekshon bastante pèrtá, ku e resultado na fabor di sr. Hernandez.
Tambe tin 4 hende nobo ta forma parti di e direktiva despues di elekshon kendenan ta Judesca Martina, Melitza Daal, Raymond Margaritha, Jhanirha Da Costa Gomez-Anita. E otro miembronan di direktiva ku a keda reeligí ta Marlon Manuela, Marilyn Lourens, Kenneth Bremer i Gregory Wilson. Pa Bonaire ta Robert Sances, i Sharlon Cathalina na St. Maarten.
E direktiva ta pa 2021-2024.
Den deklarashon pa EXTRA, sr. Hernandez a bisa ku su siguiente paso despues di elekshon ta loke el a para pe den su kampaña ta pa traha riba e Landspakket ku gobièrnu a firma ku Hulanda p’asina por a haña “transche” di sèn relashoná ku situashon di COVID-19.
E presidente nobo a bisa ku e ta bai buska informashon riba e Landspakket, pa sa kon leu ta ku e grupo (nan) di trabou ku mester a keda lanta, kaminda ta inkluí e empleado públiko. Pasó e ke sa delantá kiko ta pasando ku e grupo trabou, kiko nan ta bai hasi, i ki análisis dje aparato ta pa hasi, p’asina ABVO por haña informashon i pasa esaki over pa miembronan. pasobra ta masha esensial pa miembronan ta na altura kiko ta pasa ku Landspakket ku ta rekerí empleado públiko.
“Nos Ke duna hopi informashon pa e miembronan sa kiko ta pasa den nan servisio. I tambe lo duna nan informashon kiko ta pasa den e organisashon di ABVO”.
Sr. Hernandez a sigui bisa di a tende zonido ku e gruponan di trabou a keda instalá, i e ke haña partisipashon den e grupo di trabou.
E ke mira su miembronan ta bon sirbi. Awor aki e ke fiha riba e rumbo di Kòrsou, ku no ta pasando den su mihó tempu. No tin tempu pa gritunan ku kos lo no a bai bon den elekshon. E komishon a papia resultado kla. Mi mente ta fiha riba e Landspakket pa traha na bienestar di miembronan, sr. Hernandez a terminá bisando.