WILLEMSTAD.- Unda parlamentarionan Zita Jesus-Leito i Michelangelo ‘Lo’ Martines a keda? Unda Anthony Godett i partido KEM a keda? Nan ta ketu ketu, pero pueblo ke sa kiko nan pensamentu ta relashoná ku e situashon ku a surgi entre sindikatonan i gobièrnu.

Asina parlamentario pa Partido Nashonal di Pueblo, Elvin Gerard ta trese dilanti. E sindikatonan ta den un disputa ku gobièrnu riba eliminashon di e lei pa kòrta ku 12,5 porshento den kondishon laboral di empleadonan públiko.

E disputa ta bai riba e fecha ku ta eliminá e lei. Gobièrnu ta proponé 1 yanüari 2024 miéntras ku e sindikatonan ke bai bèk te 1 yanüari 2023. Gerard ta bisa ku ta importante ku pueblo sa kiko posishon di Jesus-Leito i Martines ta den e esaki.

“Ambos a kaba di duna nan sosten na gabinete Pisas II i asina tene e gobièrnu na bida. Pero nan ta ketu. Nan no ta bisa nada. Of ta ranka nan a bai ranka djente”.

Gerard ta mustra ku te ku resien por a tende ámbos na radionan ta papia di aspektonan sosial spesialmente penshonadonan ku mester haña mas atenshon. “Pero awor ku ta e momento pa laga nan bos resoná i sali na vanguardia di penshonadonan i tambe ámtenarnan, no ta tende nada di nan. Ta muda nan a bira, skonde nan a bai skonde òf ta for di pais nan ta?”

Foto:

...Elvin Gerard...