Awe tin reunion públiko di parlamento

WILLEMSTAD.- “Tin un motibu ku ke tene dòkternan di kas bou di tur kondishon for di e “huisartsenpost” (HAP) i segun mi ta komprondé ta pasobra tin hasimentu di ‘kuchi kuchi’ entre trahadónan”. Asina miembro di parlamento pa Partido Nashonal di Pueblo (PNP), Elvin Gerard ta deklará.

Awe djaluna 14 òktober tin reunion públiko di parlamento di Kòrsou riba HAP. Tin bastante krítika riba kuido médiko ku e sentro ta duna loke ta motibu pa frakshonnan di PNP i MAN a pidi e reunion. Gerard ta bisa mester investigá e ret ku tin den HAP i dikon ke tene tur dòkter di kas afó. “Ta pashènt di e mesun dòkternan di kas aki e dòkternan na HAP tin ku wak, pero no ke sinta ku e asosashon di dòkternan di kas, CHV pa yega na palabrashon. E kos aki ta inkreibel.”

E ta mustra mas aleu ku di otro banda HAP ke haña tur dokumento di historia médiko di tur pashènt. “E kos ei no ta bai asina. No ta tur informashon ta nesesario pa un sentro di emergensia manera HAP tin disposishon di dje i tambe dòkternan di kas mester tene nan mes na regla ku informashon di nan pashèntnan ta sekreto.”

Den e kuadro aki Gerard ta bisa ku partidonan mester bini huntu i ku inspektor di salubridat, Serving Keli tin un ròl importante den esaki. “Mi ta komprondé ku djárason awor Keli a keda di reuní ku CHV, maneho di HAP i tambe dr. Severing ku ta na kabes di e tim di dòkternan penshonado i stazjèr ku ta traha na e sentro. Mi ta hasi un apelashon serio riba Keli pa investigá e ret ku tin den HAP.”

E ret ku Gerard ta referí na dje tin di aber ku loke e ta yama hasimentu di ‘kuchi kuchi’ bou di trahadónan di HAP. Na su opinion e situashon aki ta motibu pa tene e dòkternan di kas afó loke no ta na benefisio di e kuido di pashèntnan. Na opinion di e parlamentario ta pa mesun motibu, esta pa tene e dòkternan di kas afó a skohe pa no pone e HAP den Curaçao Medical Center (CMC).

E ta menshoná 2 ehèmpel di kasonan kaminda pashèntnan ku a fayesé despues ku HAP a manda nan kas bèk, pa mustra ku ta na e sentro no a hasi e trabou manera mester ta. Por spera ku na final di e reunion di parlamento awe ku tin moshon ta subi mes tambe, Gerard ta konfirmá.

Na su punto di bista HAP mester bai den edifisio di (CMC). Esaki pasobra manera presidente di CHV, Elger Jacobus a splika ta habri un porta di e HAP yega den departamento di emergensia di CMC. Esaki ta garantisá un mihó kuido pa pashèntnan.”

Tambe Gerard ta kere ku e dòkternan di kas mes mester kore warda na e HAP. El a mustra kon Jacobus a splika ku ta bisa ku e sitio aktual di HAP ta kosta 5 mil florin so, pero esei ta sin niun remedi i ekipo. “Si hür e lokalidat na CMC e ta inkluso tur remedi, ekipo i alabes ta haña spesialistanan na warda ku den kaso di emergensia ta tuma desishon ku ta krusial pa skapa bida di pashèntnan.”

Foto:

...Elvin Gerard...