‘Promé minister a bira inkonfiabel’

WILLEMSTAD.- For di djárason mainta tempran gobernadó tabatin e kartanan di miembronan di parlamento Michelangelo ‘Low’ Martines i Zita Jesus-Leito pa indiká ku nan ta sostené gabinete Pisas II. Pues for di e momento ei tabata konosí ku tin un mayoria nobo di 11 asiento, inkluso e 9 asientonan di partido MFK, den parlamento.

Pa e motibu aki parlamentario pa Partido Nashonal di Pueblo (PNP), Elvin Gerard ta kondená e aktitut di MFK i promé minister Gilmar ‘Pik’ Pisas ku den oranan di mèrdia ainda tabata hasi komo si fuera ku ta na e momentonan ei ta bai sondia bou di frakshonnan den parlamento pa wak si por yega na un mayoria despues ku PNP a kita su sosten for di e gabinete. Segun Gerard MFK tabata sa kaba ku tin un mayoria nobo di 11 asiento pasobra a entregá e kartanan for di mainta.

“Ta un sho e kos aki tabata”, esta Gerard. E bisa mas aleu ku e akto aki ta hasi promé minister Pisas inkonfiabel pasobra el a hunga un komedia i tuma e pueblo hasi na lugá di papia e bèrdat bisando ku nan tin un mayoria kaba.

Mas aleu Gerard ta bisa ku e aktuashon di parlamentario Corine Djoen-Genaro tambe a hasi su persona inkonfiabel. Den oranan di mèrdia Djaoen-Genaro a laga sa ku e ta ku PNP, apesar di informashonnan persistente ku e tambe lo sostené e koalishon nobo ku partidonan MFK i KEM huntu ku miembro independiente Zita Jesus-Leito.

Mas anochi Djaoen-Genaro a laga PNP sa ku despues ku MFK a tuma kontakto ku su persona den oranan di atardi el a disidí ku e ta bandoná filanan di PNP i bira miembro independiente di parlamento. Segun Gerard esaki tambe tabata un komedia pasobra e palabrashon entre Djaoen-Genaro i MFK tabata traha kabá konforme e informashonnan ku tabata sirkulá for di den oranan di mainta.

Lider polítiko di partido KEM, Michelangelo ‘Lo’ Martines tabata e úniko ku a duna klaridat riba posishon e partido for di un prinsipio. “KEM semper ta kla pa traha pa pueblo di Kòrsou. Nos a bai elekshon pa traha pa pueblo di Kòrsou”, e a bisa.

E motibu prinsipal pa e último klèsh entre MFK i PNP ta e reunion di Komishon Sentral di parlamento tumultoso ku a tuma lugá djaluna último riba e desishon di minister di Finansa Javier Silvania (MFK) pa na yanüari 2023 duna eksonerashon na debe di impuesto pa 3 miar florin. Parlamentarionan di PNP,  Osepa i  Mercelina tabata krítiko den nan preguntanan pa minister Slivania durante e reunion.

Entre otro Osepa a pidi pa haña klaridat riba e base legal pa e desishon di Silvania i tambe el a referí na e veredikto di Korte di Apelashon ku a bisa ku e minister, pa medio di un publikashon riba ret sosial defakto a duna eksonerashon di tur debe di impuesto di 2017 i promé, sin tene kuenta ku niun kriterio ku normalmente ta tene na konsiderashon ora evaluá un tipo di medida asina.

Foto:

...Elvin Gerard...