‘Mi a kaba di regresá for di eksterior’

WILLEMSTAD.- Parlamentario pa partido PNP, Elvin Gerard ta refutá rumornan i insinuashonnan ku el a hiba kòmbersashon ku minister di Desaroyo Ekonómiko, Ruisandro Cijntje den fin siman tras di lomba. Gerard ta indiká ku segun e rumornan ku ta sirkulá e kòmbersashon lo mester a bai tokante un situashon ku a surgi na e Hak’e Summer Festival.

“No ta bèrdat mi no tabatin niun kòmbersashon ku minister Cijntje”, Gerard ta indiká. E parlamentario tabatin mas ku 2 siman na Colombia pa motibunan médiko i a regresá Kòrsou fin di siman pasá.

“Mi a kaba di regresá Kòrsou i no a topa ku niun hende. Na kas mi ta den seno familiar i mi amigunan mas yegá. Ainda mi ta rekuperando.” Gerard ta bisa ku e no sa for di unda e tipo di rumornan aki ta sali.

E konfrontashon entre e minister i un “hostess” durante e Hak’e Summer Festival ta tópiko di diskushon riba retnan sosial, den prensa i den práktikamente tur skina den komunidat. E por bira un situashon bastante difísil pa e minister debí na un keho ku a entregá kontra su persona.

No ta promé biaha tampoko ku e minister ta hañ’é den e tipo di situashonnan aki. Den pasado tabatin un otro kaso kaminda tabata alegá ku Cijntje lo a agredí un dama físikamente na porta di un klup nokturno ku ke a listra e minister promé ku el a drenta.

Den e kaso ei no tabatin keho entregá kontra Cijntje, pero e situashon a kousa un diskushon fuerte den seno di partido PNP te ku mester a suspendé e reunion pa evitá ku e situashon ta sali for di man. Al final partido a para tras di su minister i e splikashon ku el a duna.

Pero PNP ta konfrontá awor ku un otro kaso ku ta envolví e mesun minister kaminda awor si a entregá un keho. Segun EXRA a komprondé e situashon ta hinka Curaçao Airport Holding (CAH) tambe den un situashon poko fèrfelu.

Esaki den bista ku ta e kompania aki ta doño di e tereno kaminda ta organisá e festival pa algun aña kaba pues ku tin un bon relashon ku e organisadónan. Di otro banda e CAH ta kai den portafolio di minister Cijntje.

Foto:

...Elvin Gerard...