WILLEMSTAD.- “Mi ta reta Gibi Doran pa bisa ta ku ken Partido Nashonal di Pueblo (PNP) tabata forma gobièrnu.” Asina parlamentario pa PNP, Elvin Gerard ta duna di konosé den deklarashon pa EXTRA.

E ta reakshoná riba ponensianan di e lider di frakshon di MFK ku a indiká ku loke Gerard a bisa siman pasá, esta ku promé minister Gilmar ‘Pik’ Pisas a hunga un komedia kanando bai parlamento pa buska sosten pa gabinete Pisas II, no ta bèrdat. Segun Gerard promé ku Pisas a duna lider polítiko di PNP un karta bisando ku frakshon di MFK no ke sigui traha ku parlamentarionan di PNP, Sheldry Osepa i Gwendell Mercelina, ya kaba e tabatin un mayoria nobo firmá kaba.

Doran ta pretendé ku esaki no ta bèrdat i ta bisa, meskos ku Pisas tambe a bisa siman pasá, ku ta PNP tabata formando un koalishon. “Mi ta reta Doran bin bisa ta ku ken PNP tabata negoshá pa forma un koalishon”, Gerard ta bisa.

“Ami si por bisé na unda i ku ken tur MFK tabata negoshá for di djamars anochi, 20 di ougùstùs pasobra ta hende for di nan propio seno a bisa mi.” Banda di esaki Gerard ta splika ku ta práktikamente imposibel ku PNP ku únikamente 4 asiento ta logra haña 7 otro asiento plamá entre 4 pa 5 otro frakshon den parlamento pa asina forma un mayoria nobo kuné.

“Ke men sea Doran ta bobo òf e no sa e diferensia entre djaluna, djamars i djárason.” Tambe Gerard ta bisa ku no ta pòrnada Gobernadó a bisa e ministernan di PNP, na momento ku nan a bai entregá nan retiro djárason 21 ougùstùs tra’i mèrdia, ku ta for di mainta el a risibí 2 karta indikando ku ta sostené gabinete Pisas II, pero ku e no a tende nada di PNP tokante kiko ta pasando.

Esaki ta oro pruba, esta Gerard, ku promé ku Pisas a duna lider di PNP e karta di frakshon di MFK, e partido tabatin sosten kaba pa sigui goberná sin PNP.