Jardim komo presidente interino Banko Sentral

WILLEMSTAD.-Den un konferensha di prensa ku Banko Sentral di Korsou i St.Maarten a tene awe mainta a anunsiá kambionan pa loke ta trata e Raad van Bestuur, esta e gerensia di e banko.

Manera ta EXTRA a informá e siman aki hunta di komisario di Banko Sentral, presidí pa mr.Etienne Ys a konfirmá pa EXTRA ku ta kedando kla pa nombra un persona mas den e gerensia despues ku Bob Traa a entrega su retiro na novèmber di aña pasá.

Jose Jardim

Awe sr. Ys a anunsiá ku a nombra dr. Jose Jardim komo presidente interino di e instituto miéntras ku a buska asistensia di eks bankero Ron Gomes Casseres pa reforsá e gerensia. Bob Traa na novèmber último a anunsiá ku pa motibunan personal e no ke keda mas den e funshon di presidente interino pendiente pa bira presidente di e instituto.

Ron Gomes Casseres

Banko Sentral ta konfrontando situashonnan hopi serio den último añanan. Te ainda e eks presidente di e instituto dr. Emsley Tromp ta den korte kontra CBCS i despues di su retiro a nombra otro miembronan den gerensia ku tambe a konosé situashonnan sumamente difísil i kada un di e kasonan no a yuda e imáhen di Banko Sentral. E último tabata e kaso di Giro Bank ku ainda ta pendiente. Ron Gomes Casseres ta konosí komo un bankero serio i fuerte den maneho, tambe e ta un persona ku konosé e sektor finansiero bon. Mas detaye den edishon di EXTRA